İngiltərə Premyer Liqası: “Liverpul” Londondan bir xalla qayıdıb

İngiltərə Premyer Liqasının birinci turunun mərkəzi qarşılaşması paytaxt Londonda baş tutub.

“QELEBE.AZ” xəbər verir ki, “Çelsi” doğma meydanda “Liverpul”u qəbul edib.

“Qırmızılar”ın üstünlüyü ilə başlayan matçda hesab 18-ci dəqiqədə açılıb. Luis Dias misirli Məhəmməd Salahın dəqiq ötürməsindən sonra mersisaydlıları irəli çıxarıb. 29-cu dəqiqədə Salah topu qapıya göndərsə də, lakin VAR-a baxıldıqdan sonra qol ofsayd səbəbindən ləğv edilib. Birinci hissənin sonlarına doğru “zadəganlar”ın təzyiqi artırması hesaba da yansıyıb. 36-cı dəqiqədə “mavilər”in yeni müdafiəçisi Aksel Disasi hesabı bərabərləşdirib. 39-cu dəqiqədə Ben Çiluell qapıçı Alissonu məyus etsə də, VAR-a baxıldıqdan sonra qol ləğv edilib.

Oyunun qalan vaxtı London klubunun üstünlüyü ilə keçib, lakin tərəflərdən heç biri fərqlənə bilməyib. Beləliklə, matç 1:1 hesabı ilə başa çatıb.

Xatırladaq ki, ötən mövsüm “Liverpul” Premyer Liqanı 5-ci pillədə bitirib. “Qırmızılar” bu il Avropa Liqasında çıxış edəcəklər. “Çelsi” isə Premyer Liqada tarixinin ən pis mövsümlərindən birini keçirib. Belə ki, komanda çempionatı 44 xalla 12-ci pillədə yekunlaşdırıb.