"Araz-Naxçıvan"ın futbolçusu: "Qarabağ" kimi komandalara qarşı layiqli oynayırıq"

"Qarabağ"la oyunda göstərdik ki, güclü komandalara qarşı layiqli oyun nümayiş etdiririk".

"Report"un məlumatına görə, bunu "Araz-Naxçıvan"ın futbolçusu Miço Kuzmanoviç klubun rəsmi saytına müsahibəsində deyib.

Yarımmüdafiəçi ölkə çempionuna 1:2 hesabı ilə uduzduqları görüşün nəticəsindən razı olmadıqlarını bildirib: "Amma keçirdiyimiz 3 rəsmi qarşılaşmaya diqqət yetirdikdə, düşünürəm ki, indi daha yaxşıyıq. Bizə bir qədər zaman lazımdır. Əminliklə deyə bilərəm ki, növbəti oyunlarda daha yaxşı çıxış edəcəyik. Komandamız yeni qurulub, formalaşma dövrünü keçir. Yeni komanda üçün bunlar normaldır. Düzgün yoldayıq".

Bosniya və Herseqovinadan olan oyunçu "Qarabağ"la görüşdə son dəqiqədə buraxdıqları qoldan danışıb: "Yenə deyirəm, yaxşı oynayırıq, amma bu cür mübarizədən sonra sona 3-4 dəqiqə qalmış məğlub olmaq yolverilməzdir. Hazırkı məqamda hər xal bizim üçün çox vacibdir. Ona görə də, elə məqamlar olur ki, düzgün davranmalı və qərar qəbul etməlisən".

Kuzmanoviç komandasının lideri olmadığını vurğulayıb: "Futbol kollektiv oyundur. Hansısa məqamda fərdlər ön plana çıxa bilər. Bu gün lider olduğumu deyə bilmərəm, amma yaxşı oynayıram. Biz komandayıq, qalib gələndə hamımız sevinirik, uduzanda da məyus oluruq. Komanda yoldaşlarıma kömək edə bilirəmsə, nəticə qazanmaq üçün faydam toxunursa, xoşbəxtəm. Yenə deyirəm, yaxşı futbol göstərmək, azarkeşlərimizi sevindirmək istəyirik".

O, növbəti turda "Sumqayıt"la üz-üzə gələcəklərini xatırladıb: "Çətin olacaq. Açığı, rəqibin oyun dəsti-xətti haqda geniş məlumatım yoxdur. Müəyyən təhlillər aparılacaq, baş məşqçimiz bizim üçün faydalı olacaq tapşırıqları verəcək. Əlbəttə, istənilən halda meydana 3 xal qazanmaq üçün çıxacağıq. Rəqibimiz də yaxşı hazırlıq keçib. Onun nəticəsidir ki, keçirdikləri oyunlardan maksimum xalla ayrılıblar. Görünür, keyfiyyətli komandadır və bizimlə görüşdə də qələbə qazanmaq istəyəcəklər. Ancaq “Araz-Naxçıvan” da meydana eyni məqsədlə çıxacaq. Buna nail olmaq üçün mübarizəmizi sona qədər davam etdirəcəyik, bütün şanslarımızdan yararlanacağıq".