Vitali Borisov: “Əsas mərhələyə vəsiqənin taleyi son oyunda həllini tapacaq”

“Əsas mərhələyə vəsiqənin taleyi iki gün sonra keçirəcəyimiz son oyunda həllini tapacaq”.

“Report”un məlumatına görə, bunu “Araz-Naxçıvan” futzal klubunun baş məşqçisi Vitali Borisov UEFA Çempionlar Liqasındakı çıxışları barədə Azərbaycan Futzal Federasiyasının mətbuat xidmətinə açıqlamasında deyib.

İlkin mərhələnin ikinci turunda Almaniya çempionu “Yan Reqensburq”u 5:0 hesabı ilə məğlub edən Azərbaycan çempionu ardıcıl ikinci qələbəsini qazanıb.

V.Borisov “Yan Reqensburq”u ötən gün 9:1 hesabı ilə üstələdikləri Türkiyə çempionu “İstanbul Şişli”dən güclü hesab edib: “Maraqlı qarşılaşma izlədik. Fasilədən sonra nümayiş etdirdiyimiz oyun daha yaxşı idi. Dünənki matçla müqayisədə daha yaxşı çıxış etdik. Onu da nəzərə alaq ki, Almaniya çempionu Türkiyə komandasından daha güclüdür. Bugünkü matçı təhlil edəcəyik, düzəldilməli olan məqamları futzalçılara çatdıracağıq. Artıq son oyunu düşünməliyik”.

Qeyd edək ki, “Araz-Naxçıvan” qrupda son görüşünü avqustun 26-da Latviya klubu “Riqa”ya qarşı keçirəcək.