"Kür"ün kapitanı: "Qələbə üçün əlimizdən gələni edəcəyik"

"Komanda yeni qurulub, ilk oyunumuz idi. Sabahkı qarşılaşmada qələbə üçün əlimizdən gələni edəcəyik".

"QELEBE.AZ"un Mingəçevirə ezam olunmuş əməkdaşı xəbər verir ki, bunları "Kür" klubunun həndbolçusu Səkinə Musayeva İtaliyanın "Jomi Salerno" komandasına 19:29 hesabı ilə uduzduqları Avropa Kubokunun 1/32 final mərhələsinin ilk matçından sonra jurnalistlərə açıqlamasında deyib.

Kapitan iddialı olduqlarını bildirib: "Görüşə hazırlıqlarımız yaxşı keçmişdi. Gündə iki dəfə məşq edirdik. Yeni kollektivik. İnanıram ki, daha yaxşı olacaq".

Oyunçu məğlubiyyətin səbəbini bilmədiyini söyləyib: "Baş məşqçi ilə danışacağıq. Ümid edirəm ki, cütün taleyini xeyrimizə həll edəcəyik".

Qeyd edək ki, tərəflər arasındakı cavab oyunu sentyabrın 24-də gerçəkləşəcək.