"Şəki"nin baş məşqçisi böyük hesabla uduzmaqlarının səbəbini açıqlayıb

"Dünən həm hücumda, həm də müdafiə strategiyasında pis oynadıq".

"QELEBE.AZ"un məlumatına görə, bunu Azərbaycan Basketbol Liqasında çıxış edən "Şəki"nin baş məşqçisi Aleks Uco "NTD-İndiqo"ya 54:120 hesabı ilə uduzduqları IX turun oyunu ilə bağlı danışarkən deyib.

Mütəxəssis qarşılaşmada çox sərt oynamadıqlarını və matçda aktiv qalmadıqlarını söyləyib: "Halbuki bu baxımdan komanda ilə razılaşmışdıq və belə oynamağa söz vermişdik. 19 xal itkisi və rəqibimizin bundan 33 xal toplaması güclü rəqabət aparmaq istəyən komanda üçün böyük geriləmədir".

Baş məşqçi böyükhesablı məğlubiyyətə də toxunub: "66 xallı yüksək fərqlə niyə uduzduğumuzu göstərən statistik hesabatı sizə təqdim edə bilərəm. Ehtiyatdan meydana çıxan basketbolçular oyunumuzda yüksəliş edə bilmədilər. Hər halda, biz hələ də ağır məşqlərə davam edib, hücum və müdafiə planında oyunumuzu düzəltməyə çalışacağıq".

Qeyd edək ki, "Şəki" 9 xalla çempionatın sonuncu pilləsində qərarlaşıb.