"Zaqatala" klubu ilə bağlı layihənin təqdimat tədbiri baş tutub

Futbolun İnkişaf Fondunun (FİF) təşkilatçılığı ilə Zaqatala PFK - “Biznes klub” layihəsinin təqdimat tədbiri baş tutub.

FİF-dən "Report"a verilən məlumata görə, tədbirdə “Zaqatala” klubunun rəhbərliyi, bölgə nümayəndələri, fərdi sahibkarlar, özəl sektorun nümayəndələri ilə yanaşı, FİF-in Himayəçilər Şurasının üzvləri Fəxrəddin Manafov və Şaiq Qəribzadə iştirak ediblər.

Mərasimi giriş sözü ilə I Liqa təmsilçisinin İdarə Heyətinin üzvü Musa Qurbanov açdıqdan sonra fondun icraçı direktoru Tural Piriyev FİF-in fəaliyyəti, “Zaqatala“ klubu və “Biznes klub” layihəsi barədə ətraflı məlumat verib.

Daha sonra “Turan Tovuz”un İdarə Heyətinin sədri Ehtiram Quliyev sponsor qismində təcrübəsini bölüşüb, həmçinin kluba dəstəyin bölgə üçün sosial-iqtisadi əhəmiyyətindən və futbol tərəfdaşlığının biznesə faydalarından danışıb.

Tədbirdə qonaq qismində iştirak edən, Zaqatala futbolunun yetirməsi, "Qarabağ"ın baş məşqçisi Qurban Qurbanov region futbolunun, xüsusilə uşaq futbolunun inkişafı üçün bölgə klubuna dəstəyin vacibliyini vurğulayıb. Həmçinin o, “Biznes klub” layihəsinə qoşularaq “Zaqatala”ya daim dəstək göstərəcəyini bildirib və kluba dəstək üçün FİF-in əməkdaşlarına təşəkkürünü bildirib.

Müzakirə formatında davam edən tədbirdə iştirakçılar klubun inkişafı, maliyyə dayanıqlığının təmin olunması ilə bağlı fikir mübadiləsi aparıblar. Sonda “Zaqatala”nın prezidenti Şaban Şirdanov tədbir iştirakçılarına dəstək olduqlarına və klubun inkişafında iştiraklarına görə təşəkkürünü bildirib.

“Biznes klub” layihəsinin iştirakçılarının sayı və maliyyə hesabatı ictimaiyyətə açıqlanacaq.

Qeyd edək ki, ilk olaraq Zaqatalada başladılan “Biznes klub” layihəsi digər regionlarda da tətbiq olunacaq.