“Qəbələ”nin futbolçusu: “Ölkə kubokunda üstün tərəf bizik”

“Ölkə kubokunda üstün tərəf bizik”.

Bunu “QELEBE.AZ”a açıqlamasında “Qəbələ”nin futbolçusu Emil Səfərov Azərbaycan Kubokunun 1/4 final mərhələsində “Araz-Naxçıvan” önündə şanslarını dəyərləndirərkən deyib.

Səfərdə heç-heçə (1:1) etdiklərini xatırladan 21 yaşlı yarımmüdafiəçi bunun onlara üstünlük qazandırdığını düşünür: “Kubokda mərhələ adlamaq şansımız çoxdur. Nəzərə alaq ki, cavab görüşünü evdə keçirəcəyik. Meydana istəkli çıxacağıq”.

“Dalğa Arena”da baş tutan qarşılaşmanın 58-ci dəqiqəsində zədələnərək əvəzlənən Azərbaycan millisinin üzvü vəziyyətin ciddi olmadığını bildirib: “Səhhətimlə bağlı hər şey qaydasındadır. Növbəti matçda meydanda ola biləcəyəm”.

Emil Səfərov Azərbaycan Premyer Liqasında 20 turdan sonra 14 xalla sonuncu pillədə qərarlaşmalarına da münasibət bildirib. Gənc orta sahə oyunçusu vəziyyətin düzələcəyinə inanır: “Bilirik ki, ümumi durum heç də yaxşı deyil. Amma hələ heç nə bitməyib. Hər şey özümüzdən asılıdır. Birlikdə bunun öhdəsindən gələcəyimizə inanıram”.

Qeyd edək ki, “Qəbələ” Premyer Liqanın XXI turunda “Zirə”ni (4 fevral), Azərbaycan Kubokunun 1/4 final mərhələsinin cavab görüşündə isə “Araz-Naxçıvan”ı (9 fevral) qəbul edəcək.