Azərbaycanın basketbol millisi İsveçrə və Kosovo ilə oyunların hazırlıqlarına başlayıb

Azərbaycanın kişilərdən ibarət basketbol millisi Türkiyənin İstanbul şəhərində 2027-ci ildə Qətərdə keçiriləcək Dünya Kubokunun təsnifat mərhələsinin oyunlarına hazırlıq məqsədi daşıyan təlim-məşq toplanışına start verib.

"Report" xəbər verir ki, komanda baş məşqçi Tahir Baxşıyevin rəhbərliyi altında gündə iki dəfə olmaqla həm fiziki, həm də taktiki məşqlər edir.

Fevralın 21-nə qədər davam edəcək təlim-məşq toplanışında bu basketbolçular iştirak edirlər: Amil Həmzəyev, Orxan Aydın, Zaur Paşayev, Endər Poladxanlı, Nəzər Quliyev, Əkbər Məmmədov, Kamran Məmmədov, Ulaş Turgut, Cəbrayıl Əkbərov, Elşad Şirzadov, Şirzad Şirzadov, Fikrət Ələkbərov, Rəşid Abbasov, Səid İsmayılov, Sadettin Donat, Ercan Donat. Millimizin digər iki üzvü Zek Ledey və Donta Hol komandaya İsveçrədə qoşulacaqlar.

Hazırlıq prosesinin sonunda məşqçilər korpusu tərəfindən 12 basketbolçu millinin yekun heyətinə cəlb olunacaq.

Qeyd edək ki, yığmamız təsnifat mərhələsində ilk görüşünü fevralın 22-də, Bakı vaxtı ilə saat 22:00 -da səfərdə İsveçrəyə, ikinci oyununu isə fevralın 25-də Bakıda Kosovoya qarşı keçirəcək.