Azərbaycan millisinin baş məşqçisi: Qrupumuzun favoriti Sloveniyadır

Qrupumuzun favoriti Sloveniyadır.

Bunu “QELEBE.AZ”a açıqlamasında 17 yaşadək qadın futbolçulardan ibarət Azərbaycan millisinin baş məşqçisi Nərgiz Qurbanova Avropa çempionatının seçmə mərhələsinin II raundundakı rəqiblər barədə danışarkən deyib.

Mütəxəssis B Liqasının 2-ci qrupunda iki komandanı fərqləndirib: “Moldova ilə müqayisədə Sloveniya və Bolqarıstan daha güclü komandalardır. Onlar A Liqasından gəliblər. Bu rəqiblərlə oyun daha çətin olacaq. Onların gücünə baxmayaraq, hər üç matçda müsbət nəticə qazanmaq üçün əlimizdən gələni edəcəyik”.

Baş məşqçi heyətdə bəzi dəyişikliklər edildiyini vurğulayıb: “Avropa çempionatının seçmə mərhələsinə hazırlıq üçün futbolçuları əvvəlcə elit-məşqlərə cəlb etmişdik. Ardından Bakıda təlim-məşq toplanışında olduq. Heyətimizdə zədəli oyunçunun olmaması sevindiricidir. 5 yeni futbolçu dəvət etmişik. Ötən il 2007-2008-ci il təvəllüdlülər oynayırdılarsa, UEFA-nın qərarına əsasən bu il 2009-cu il təvəllüdlü futbolçular da çağırmaq mümkündür. Buna görə də 2009-cu il təvəllüdlülərə üstünlük vermişik. Onlardan ən azı ikisini əsas heyətdə oynatmağı planlaşdırırıq”.

Qeyd edək ki, Azərbaycan millisi martın 14-də Bolqarıstan, 17-də Sloveniya, 20-də isə Moldova ilə qarşılaşacaq. Qrupun bütün görüşləri Bolqarıstanda keçiriləcək.