ABF rəsmisi: Əminik ki, kişi boksçularımız Paris-2024-ə maksimum vəsiqə ilə yollanacaqlar

Əminik ki, kişi boksçularımız Paris-2024-ə maksimum vəsiqə ilə yollanacaqlar.

"QELEBE.AZ" xəbər verir ki, bunu Azərbaycan Boks Federasiyasının (ABF) mətbuat xidmətinə açıqlamasında qurumun prezidentinin müşaviri Samir Hüseynov deyib.

ABF rəsmisi İtaliyanın Busto Arsizio şəhərində keçirilən I Dünya Olimpiya Təsnifat Turnirindən qayıdan Azərbaycan millisinin çıxışını yüksək qiymətləndirib: “113 ölkə arasında lisenziya qazanmaq təqdirəlayiq haldır. Nəzərə alaq ki, bir çox ölkə, o cümlədən Ermənistan və Gürcüstan vəsiqəyə sahib ola bilmədilər. İndiyədək kişilər arasında 3 lisenziya qazanmaqla dünya ölkələrinin sıralamasında 7-11-ci yerləri bölüşürük. Əminik ki, Tailandda keçiriləcək növbəti təsnifat turnirində digər 4 çəkidə də uğur qazana biləcəyik. Eyni zamanda, qadın boksçulardan ibarət milli üçün də əlavə proqram hazırlamışıq. Onların da lisenziya qazanacaqlarına ümid edirik".

O, son illərdə federasiyanın fəaliyyətində ciddi dəyişikliklər olduğunu, aparılan islahatlar nəticəsində Avropa və dünya çempionatlarında kifayət qədər ciddi nailiyyətlər əldə edildiyini, 2022-ci ildə 77 medal, 1 il sonra bu rəqəmin 179-a yüksəldiyini vurğulayıb: “Bu, göstərir ki, apardığımız siyasət doğrudur. Paris-2024-də nəticələr daha yaxşı olacaq”.