Azərbaycan futbolunun tarixi gecəsi - "Qarabağ" Almaniyada möcüzə axtarışında - ŞƏRH

Azərbaycan futbolunun nəbzi bu gün Almaniyada döyünəcək. "Qarabağ" Leverkuzendə tarixi oyuna çıxacaq. "Köhlən atlar" UEFA Avropa Liqasının 1/8 final mərhələsinin cavab matçında "Bayer 04" ilə münasibətləri aydınlaşdıracaq. Bura qədər irəliləməklə Azərbaycan futbolunda yeni səhifə açan Qurban Qurbanovun komandası daha bir tarixi uğurun astanasındadır. Bunu gerçəkləşdirmək üçün isə cəmi bir addım kifayətdir.

Bəs bu hədəfə çatmaq nə dərəcədə realdır? Ağdam təmsilçisinin Avropa Liqasının 1/4 finalçıları, yəni ən güclü 8 komandası sırasında yer alması mümkündür? Etiraf etmək lazımdır ki, Azərbaycan çempionunun Leverkuzendə işi heç də asan olmayacaq. Rəqib Avropanın ən hazırlıqlı, mobil, saat mexanizmi kimi dəqiq işləyən, qarşısıalınmaz komandasıdır. Zarafat deyil, Xabi Alonsonun yetirmələri ardıcıl 36 oyundur məğlubiyyətin nə olduğunu bilmir. Leverkuzen təmsilçisi bu görüşlərin 31-də qələbə sevinci yaşayıb, rəqiblərinin qapısından 100-dən çox top keçirib. Bir sözlə, "alman maşını" hazırda nəinki qitə, dünya miqyasında ən stabil komandadır. Bundesliqada turnir cədvəlinin zirvəsində qərarlaşan "Bayer 04" Avropa Liqasında da inamla irəliləyir.

Amma bu nüanslar, təbii ki, ruhdan düşmək, indidən "ağ bayraq" qaldırmaq üçün əsas olmamalıdır. Turnirin qrup mərhələsində də "Bayer 04" ilə qarşılaşan "köhlən atlar" rəqibini daha dərindən tanıyır. Bir müddət əvvəl Leverkuzen təmsilçisinin düşərgəsinə səfər edən Qurban Qurbanov üçün bu komanda sirli qutu sayıla bilməz, əksinə, oxunmuş kitabdır. Martın 7-də Tofiq Bəhramov adına Respublika stadionunda reallaşan 1/8 finalın ilk görüşündə də bunun şahidi olduq.

Düzdür, daha çox Bundesliqanı düşünən Xabi Alonso Bakıda meydana ilk dəqiqələrdən sərəncamında olan əsas fiqurların hamısını buraxmamışdı. İspaniyalı mütəxəssis bir növ "az qan"la Almaniyaya zəfərlə dönəcəyini düşünürdü. Amma ilk 45 dəqiqədən sonra yanıldığının fərqinə vardı və yanında oturtduğu əsas fiqurları ikinci hissədə döyüşə atdı. 2:0 hesablı üstünlüyü yaxalamaq üçün böyük güc və enerji sərf edən "Qarabağ"ın futbolçuları da yoruldu, ilk hissədəki təravətdən əsər-əlamət qalmadı. Abdullah Zubirin uşaq səhvindən sonra fərqi azaldan qonaqlar oyunun sonlarında bərabərliyi də təmin etdilər.

Halbuki sonluq yağışlı havada tribunalarda, həmçinin televizorlar önündə "Qarabağ"ı irəli səsləyən azarkeşlər üçün uğurlu, Bundesliqanın lideri üçün isə uğursuz ola bilərdi. Zubir kobud səhv etməsəydi, Olavio Juninyo hesab 2:1 olarkən qapıçı ilə dueldən qalib ayrılsaydı... Əlbəttə, daha komfortlu nəticə ilə səfərə yollanmaq "Qarabağ"a əlavə üstünlüklər də verəcəkdi. Təmsilçimiz meydana psixoloji cəhətdən daha rahat çıxacaq, rəqibin böyük qüvvə ilə irəli atılmasına, müdafiədə boşluqlar verməsinə bel bağlayacaqdı. İndiki halda isə...

Əslində, cari avrokubok mövsümündə boyundan yuxarı tullanan, Avropa Liqasının pley-off mərhələsində "Braqa"nı sıradan çıxarmaqla proqnozları alt-üst edən "Qarabağ"ın itirəcəyi heç nə yoxdur. Komanda, necə deyərlər, planı artıqlaması ilə yerinə yetirib. Bu gün də meydana üzərində ciddi təzyiq olmadan çıxacaq. 36 oyunluq məğlubiyyətsizlik seriyası ilə futbol dünyasına səs salan "Bayer 04" isə tam fərqli durumdadır, itirəcəyi çox şey var. Ümid edək ki, Bundesliqanın liderinə bu işdə "Qarabağ" "kömək" edəcək. Azərbaycan futbolunun tarixi gecəsində, Leverkuzendə, möcüzə axtarışına çıxan "Qarabağ"...