AFFA rəsmisi: Premyer Liqanı sonuncu yerdə "Qəbələ" başa vuracaq

Premyer Liqanı sonuncu yerdə "Qəbələ" başa vuracaq.

Bunu "QELEBE.AZ"a açıqlamasında AFFA-nın əməkdaşı, məşqçi kurslarının maarifləndirmə üzrə direktoru Aslan Kərimov Azərbaycan Premyer Liqasının 4-cü - sonuncu dövrəsi ilə bağlı danışarkən bildirib.

51 yaşlı mütəxəssis son dövrənin rəqabətli keçəcəyini düşünür: "Dördüncü dövrədə "Qarabağ" istisna olmaqla, digər klublar arasında gərgin rəqabət yaşanacaq. Xal baxımından bir-birlərinə çox yaxındırlar. Altıncı pillədə qərarlaşan "Səbail"in 37 xalı var və 2-ci yerdən 3 xal geri qalır. "Neftçi", "Sabah", "Zirə" və "Sumqayıt"ın medal qazanmaq şansları var. Son oyunlarda "Sabah" ilə "Neftçi" inamlı təsir bağışlayıblar. Sadəcə, çempionatın əvvəlində itirdikləri xallara görə "Qarabağ"la mübarizə apara bilmirlər. "Zirə" də bu rəqabətin içindədir. Avrokuboklara vəsiqə və medallar uğrunda əsas mübarizə bu 3 komanda arasında gedəcək".

Azərbaycan millisinin və "Qarabağ"ın sabiq kapitanı "Qəbələ"nin Premyer Liqanı tərk edib-etməyəcəyi ilə bağlı məsələyə də toxunub: "Bəlkə də qış fasiləsinə qədər mənə desəydilər ki, "Qəbələ" Premyer Liqanı tərk edəcək, buna inanmazdım. Mənim kimi bir çoxları bununla razılaşmazdılar. Doğrusu, bu uğursuzluğun çalarları görünürdü. Transferlərin uyğunsuzluğu onların bu duruma düşmələrinə səbəb oldu. "Kəpəz"in güclənməsi yekunda "Qəbələ"ni çempionatın autsayderinə çevirdi. Onlar bu yerə layiq deyil. Amma oyun üslublarına görə danışsaq, mövsümü axırıncı yerdə başa vuracaqları aşkar görünür. 11 xallıq fərqi son turlarda aradan qaldırmaları çox çətin olacaq. Çünki "Kəpəz" adi motivasiya ilə oyunlara çıxan komanda deyil. Bu baxımdan turniri sonuncu yerdə "Qəbələ" başa vuracaq".

A.Kərimov "Qarabağ"ın Azərbaycan Premyer Liqasında rəqabətlə üzləşməməsini şərh edib: "Təbii ki, böyük xal fərqinin olması nəinki "Qarabağ"a, bütün klublarımıza mənfi təsir edir. Komandalar yüksək intensivlikdə, səviyyədə oyunlar keçirmirlər. "Qarabağ" Avropada rəqabətli oyunlarının sayını artırıb. Daxili çempionatdakı rəqabətsizlik mühitində böyük məbləğə oyunçu almaq da çətin olur. Digər klublarımız yalnız öz aralarında mübarizə aparırlar. "Qarabağ" kimi komanda yaratmaq üçün vaxt lazımdır, amma bu o qədər də çətin deyil. Düzgün istiqamət götürülsə, bunun öhdəsindən gəlmək mümkün olar".

Qeyd edək ki, Azərbaycan Premyer Liqasında dördüncü dövrəyə bu gün keçiriləcək 2 oyunla start veriləcək. Saat 16:30-da "Qəbələ" doğma meydanda "Neftçi"ni, 19:00-da isə "Kəpəz" Tofiq Bəhramov adına Respublika stadionunda "Qarabağ"ı sınağa çəkəcək.