Azərbaycan badmintonçularının Paris-2024-ə hazırlıq planı müəyyənləşib

Paris-2024-ə uyğunlaşmaq üçün yarışa bir ay qalmış badmintonçuları Avropaya aparacağıq.

Bunu “Report”a açıqlamasında Azərbaycanın badminton millisinin baş məşqçisi Morteza Validarvi Paris-2024-ə hazırlıq planı haqqında danışarkən deyib.

M.Validarvi son bir ildəki hazırlıq müddətində badmintonçulardan razı qaldığını deyib: “Paris-2024-ə hazırlıqlara keçən il mayın 1-də başlayıb, bu il aprelin 28-də bitirmişik. Eddi Reski Dviçayo 26 000 xalla 28-ci, Keişa Fatimə Zəhra isə 25 000 xalla 31-ci oldu. Bu müddət ərzində Reski 5, Fatimə isə 6 medal qazanıb. Aprelin 14-də son yarışımız “Europe Continental”ın fərdi yarışlarında yaxşı nəticələr əldə etdik. Dviçayonun medal qazanmasına bir addım qalmışdı. O və Fatimə keçən il Avropa çempionatında öz qruplarında birinci oldular. Medal qazanmaq üçün 2 xalımız çatmadı. Halbuki Fatimə Azərbaycana ilk fəxri medalını gətirə bilərdi. Bütün bunlara əsasən olimpiadaya hazırlıqları yaxşı keçirdiyimizi deyə bilərəm”.

O, Paris-2024-ə bir ay qalmış badmintonçuların Avropada hazırlıq keçəcəklərini vurğulayıb: “Paris-2024-ə növbəti hazırlıq mərhələsi olacaq. İki yarışa qatılacağıq. Onlardan biri Malayziya və İndoneziyada, digəri Avropada olacaq. Mümkündür ki, Belçika və ya Danimarkada yarışlara qatılaq. Asiyadakı yarışda texniki-taktiki və fiziki durumu qaydasına salmalıyıq. Paris-2024-ə uyğunlaşmaq üçün yarışa bir ay qalmış badmintonçuları Avropaya aparacağıq. İlk yarışımız “Tayland Super Series 500”, daha sonra “Malaysia Super Series 500” olacaq. Yüksək səviyyəli yarışlardır. Ardınca “Turkish Speaking Language”də iştirak edəcəyik. Son yarışımız Fransanın Nant şəhərində olacaq. Bu, Paris-2024-ə uyğunlaşmağa hesablanıb. Starta bir ay qalmış bütün hazırlıqları Avropada keçirməyi düşünürük. Ola bilsin, güclü rəqib tapsaq, Bakıya da dəvət edərik”.