Azərbaycan atletika millisinin baş məşqçisi: Komanda Özbəkistanda orta səviyyədə çıxış etdi

Komanda Özbəkistanda orta səviyyədə çıxış etdi.

Bunu “Report”a açıqlamasında atletika üzrə Azərbaycan millisinin baş məşqçisi Hakim İbrahimov deyib.

O, Özbəkistanda keçirilən Açıq Mərkəzi Asiya çempionatında idmançılarımızın göstərdiyi nəticələri dəyərləndirib: “Özbəkistanda Rüstəm Məmmədovdan medal gözləyirdik. Çünki o, Türkiyədəki çıxış ilə hazırlığının yaxşı səviyyədə olduğunu göstərmişdi. Açığı, Nazim Babayevdən daha yaxşı cəhdlər gözləyirdik. Ola bilər ki, iqlimə uyğunlaşa bilmədi. Onun qarşıda yarışları var. Azərbaycan çempionatı mayın 17-18-də olacaq. Bundan əlavə, Türkiyənin İzmir şəhərində mayın 25-26-da Balkan çempionatı keçiriləcək. İki qadın, beş kişi idmançı olmaqla bu yarışda iştirak edəcəyik. Nazim Avropa çempionatına lisenziya qazanan iki idmançımızdan biridir. Digəri Anna Skidandır. İnşallah, iyunun əvvəlindən başlayacaq yarışda iştirak edəcəklər. Yaxın günlərdə daha hansı idmançılarımızın Avropa çempionatına gedəcəyinə qərar veriləcək”.

H.İbrahimov 18 yaşadək idmançıların Yakutiyada beynəlxalq turnirə qatılacaqlarını deyib: “Bu yarışa 8 qız, eyni sayda oğlan idmançı olmaqla 16 nəfərlik heyətlə qatılacağıq. Bundan əlavə, 18 yaşadək idmançılar arasında Balkan çempionatı da keçiriləcək. Həmçinin 18 yaşadək idmançılar arasında Avropa çempionatına İlahə Quliyeva qatılacaq. Daha sonra Paris-2024 olimpiadasına hazırlaşacağıq. Hazırda idmançılarımızdan yalnız Anna Skidan bu yarışa lisenziya qazanıb. Digər namizədlər Nazim Babayevlə Yekaterina Sarıyevadır. İyunun axırına qədər normativləri yerinə yetirməlidirlər. Bir də reytinqdə ilk “32-liy”ə düşən idmançılar yarışa dəvət alacaqlar”.

Qeyd edək ki, Özbəkistanda üçtəkanla tullanmada Rüstəm Məmmədov yarışın qalibi olub. Nazim Babayev isə uzunluğa tullanmada ikinci yerir tutub.