Azərbaycanın 3x3 basketbol millisi təlim-məşq toplanışına yollanıb

Kişilərdən ibarət Azərbaycanın 3x3 basketbol millisi təlim-məşq toplanışı üçün Seribayanın Novi Sad şəhərinə yola düşüb.

"QELEBE.AZ" xəbər verir ki, Amil Həmzəyev, Zaur Paşayev, Cəbrayıl Əkbərov, Endər Poladxanlı və Kamran Məmmədovdan ibarət heyətə qarşıdakı günlərdə Cordan Deyvisin də qoşulması gözlənilir.

Bu basketbolçular arasından seçiləcək 4 nəfərlik yekun heyətə hazırlıq prosesinin sonlarında qərar veriləcək.

İyunun 7-nə qədər davam edəcək toplanış iyunun 8-9-da Kosovonun paytaxtı Priştinada keçiriləcək Avropa Kubokunun təsnifat mərhələsinə hazırlıq xarakteri daşıyır.

Qeyd edək ki, millimiz təsnifat mərhələsinin B qrupunda Kosovo, Kipr, Albaniya və Ermənistan yığmaları ilə qarşılaşacaq.