Deputatlar AVRO-2024-də kimə azarkeşlik edir? - Fransanın adı gələndə üzümü çevirirəm - SORĞU

Almaniyada keçirilən futbol üzrə AVRO-2024 oyunları bütün dünyada maraqla izlənir. Çempionatı izləyənlər arasında xarici ölkələrin dövlət rəsmiləri də var. Bəs görəsən, Azərbaycan deputatları Avropa çempionatını izləyirlərmi?

Onlar hansı ölkələrə azarkeşlik edirlər, hansı komandaları finalda görmək istəyirlər, eləcə də, hansı futbolçunun oyunundan zövq alırlar?

“QELEBE.AZ”un əməkdaşları bu suallarla bir neçə deputata müraciət ediblər:

Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Aqil Abbasov komandasında türk əsilli oyunçular olduğuna görə Almaniyanı dəstəklədiyini bildirib:

“Evdə ailəmlə birgə Türkiyəni də dəstəkləyirik, lakin bu yığmanın gücü məni çox da qane etmir”.

Fəzail Ağamalı

Milli Məclisin Hüquq siyasəti və dövlət quruculuğu komitəsinin üzvü Fəzail Ağamalı isə Türkiyəni dəstəklədiyini deyib. O futbolçulardan Arda Güler və Hakan Çalhanoğluna xüsusi rəğbətinin olduğunu bildirib. Deputat həmçinin qeyd edib ki, Fransadan xoşu gəlmədiyi üçün çempionatda iştirak edən millisinin adı gələndə ümumiyyətlə üzünü çevirir.

Razi Nurullayev

Parlamentin İnsan hüquqları komitəsinin üzvü Razi Nurullayevin Avropa çempionatının bütün oyunlarına baxmağa vaxtı yoxdur. O deyib ki, zaman tapdıqca baxmağa çalışır və əlbəttə ki, Türkiyəni dəstəkləyir:

“Qardaş ölkəmizin Gürcüstan üzərindəki qələbəsinə çox sevinmişdim. Arda Gülerin 19 yaşı olmasına baxmayaraq, yeni qəhrəmana çevrilməsi hətta Türkiyə prezidentinin ona şəxsən zəng vurub təbrik etməsi olduqca sevindirici haldır. Arda Güleri artıq Türkiyənin Messisi adlandırırlar. Almaniya və İngiltərə də diqqət mərkəzimdədir”.

O digər ölkələrdə bəyəndiyi oyunçunun isə Ronaldo olduğunu qeyd edib.

R.Nurullayev həmçinin Fransa yığmasının oyunlarını maraqla izlədiyini vurğulayıb:

“Bəzi insanlar futbola siyasi cəhətdən yaxınlaşsa da mən bunun əleyhinəyəm. Fransanın ölkəmizə münasibəti pisdir deyə bu ölkənin komandasının uduzmağını istəyirəm desəm yalan olar. Fransa çox yaxşı futbolçulara sahibdir və oyunlar gedən zaman maraqla izləyirəm. Məncə futbol bu məsələdən ayrı tutulsa yaxşı olar”.

Milli Məclisin deputatı Elman Nəsirov vaxtının az olduğundan ancaq özünün mühüm bildiyi oyunlara baxdığını bildirib:

“Avropa çempionatına baxmağa vaxtım olmadığına görə Almaniya-Macarıstan kimi mühüm hesab etdiyim oyunları izləyirəm. Bundan əlavə Xorvatiyanın oyunundan xoşum gəlir. Son zamanlar Albaniyanın fəallaşmağı komandaya olan marağımı oyadıb ”.

Siyavuş Novruzov

Milli Məclisin Regional məsələlər komitəsinin sədri Siyavuş Novruzov Avropa çempionatını izləmədəyini, ümumiyyətlə heç bir komandanı dəstəkləmədiyini deyib.

Hikmət Babaoğlu

Müdafiə, təhlükəsizlik və korrupsiya ilə mübarizə komitəsinin sədr müavini Hikmət Babaoğlu isə Türkiyənin millisini dəstəkləyir: “Oyunçulardan isə təbii ki, Gürcüstana qarşı çempionatın ən gözəl qolunu vuran Arda Gülerin oyununu bəyənirəm. Ailəmlə birgə Türkiyənin çempion olmağını arzulayırıq. Mənim bəxtim gətirib ki, xanımımla birgə oyunlara böyük maraqla baxdığımız üçün evdə bu mövzuda mübahisə yaşanmır. Bəzən o, oyunları məndən daha həyəcanla izləyir. Türkiyədən sonra Almaniyanın oyunlarına azarkeşlik edirəm”.

Deputat Fransanın oyunlarını ümumiyyətlə boykot etdiyini bəyan edib.

Asim Mollazadə

Milli Məclisinin deputatı, Demokratik İslahatlar Partiyasının sədri Asim Mollazadə çempionata baxmadığını, amma ümumilikdə Türkiyəni dəstəklədiyini deyib.

Milli Məclisin əmək və sosial siyasət komitəsinin sədr müavini Məlahət İbrahimqızı Avropa oyunlarının bütün oyunlarını izləmədiyini deyib:

“Hamımız milli məsələ olduğuna görə Türkiyəni dəstəkləyirik. Azərbaycan oynasaydı da hər iki komandanı dəstəkləyəcəkdim. Çünki bir millətin iki komandasıdır. Çox zövqlə Türkiyənin oyununu izlədim. Mətbuatdan oxuduğuma əsasən deyirəm ki, əlli mindən çox Türkiyə azarkeşi stadionda olub və onlar mehtər marşı oxuyub, Türk bayrağını, hətta Azərbaycan bayrağını dalğalandırıblar. Azarkeşlərin Almaniya küçələrini qırmızı bayraqlarla boyaması məni Türk olduğum üçün bir daha qürurlandırdı”.

Bununla belə xanım deputat deyib ki, Fransa komandasının məğlubiyyəti də onu sevindirər:

“Onsuz da Fransanın dövlət siyasəti, Makronun xarici siyasəti Azərbaycanın xarici diplomatiyası qarşısında məğlub olub. Fransa Cənubi Qafqazda nə qədər fitnə törətməyə çalışsa da, Azərbaycanla Ermənistan arasında ikitərəfli sazişin qarşısını ala bilmədi”.

Sevil Seymur,
Selcan Zaurqızı