Azərbaycanın voleybol milliləri Türkiyədə turnirdə iştirak ediblər

Türkiyənin Balıkesir şəhərində təşkil olunan çimərlik voleybolu üzrə “Bioderma Pro Beach Tour” açıq çempionatı başa çatıb.

"Report"un məlumatına görə, yarışda Azərbaycanın iki qadın (Fidan Əhmədxanova/Nərmin Səmədzadə, Çinarə Quliyeva/ Larisa Smeltsova), üç kişi (Heydər Məmmədli/Fərda Dünyayev, Nəriman Bayramlı/Məhəmməd Aslanlı, Akşin Ağazadə/İbrahim Məmmədov) komandası iştirak edib.

Qızlar komanda hesabında 5-ci, oğlanlar isə 6-cı olublar. Turnirdə ümumilikdə 20 qız, 20 oğlan kollektiv mübarizə aparıb.

Qeyd edək ki, çimərlik voleybolçuları növbəti yarışda iştirak etmək üçün sabah Gürcüstana yola düşəcəklər. Qızlar və oğlanlar iyulun 11-14-də Kaçreti şəhərində təşkil olunacaq 18 yaşlıların (U-18) Avropa çempionatına qatılacaqlar.