Karlo Ançelotti 44 ildən sonra yeni rekorda imza atıb

"Real"ın baş məşqçisi Karlo Ançelotti İspaniya çempionatında 44 ildən sonra yeni rekorda imza atıb.

"Report"un məlumatına görə, 65 yaşlı mütəxəssis buna La Liqanın VII turunda "Alaves"ə qalib gəlməklə (3:2) nail olub.

Ançelotti paytaxt təmsilçisi ilə çempionatda ardıcıl 39 matçda uduzmayıb.

Əvvəlki rekord "Real Sosyedad"ın sabiq baş məşqçisi Alberto Ormaeçaya məxsus olub. 2005-ci ildə 66 yaşında dünyasını dəyişən mütəxəssis 1979-1980-ci illər aralığında Bask klubu ilə 38 qarşılaşmada uduzmayıb.

Qeyd edək ki, "Real"ın hazırkı uğuru La Liqa tarixində ikinci ən uzun seriyadır. "Barselona" 2017-2018-ci illərdə 43 görüşdə yenilməyib. Lakin həmin müddətdə komandada Luis Enrike və Ernesto Valverde baş məşqçi işləyib.