İngiltərə Premyer Liqası: “Liverpul” inamlı qələbə qazanaraq “Çelsi” ilə xal fərqini 7-yə çatdırıb

İngiltərə Premyer Liqasının 18-ci turu çərçivəsində lider “Liverpul” autsayder “Lester”i qəbul edib.

“QELEBE.AZ” xəbər verir ki, baş hakim Darren Bondun idarə etdiyi matç “Enfild”də baş tutub.

Oyunda hesabı qonaqlar açıb: 6-cı dəqiqədə Cordan Ayu dəqiq zərbə ilə topu tora qovuşdurub. “Qırmızılar”dan cavab birinci hissəyə əlavə edilmiş vaxtda gəlib: Kodi Qakpo Aleksis Mak Allisterin ötürməsindən maksimum yararlanıb – 1:1.

Matçın ikinci hissəsi isə “Liverpul”un böyük təzyiqi ilə başlayıb. 49-cu dəqiqədə ingiltərəli yarımmüdafiəçi Körtis Cons hesabdakı tarazlığı pozaraq hesabı “qırmızılar”ın lehinə dəyişib – 2:1. Qarşılaşmada son nöqtəni isə 82-ci dəqiqədə misirli hücumçu Məhəmməd Salah qoyub – 3:1.

Beləliklə, bu qələbə ilə “Liverpul” zirvədəki yerini bərkidib. Arne Slotun komandasının 42 xalı var ki, bu da onları ən yaxın təqibçisi “Çelsi”dən 7 xal üstün edir. Bundan başqa, Mersisayd təmsilçisinin ehtiyatında bir oyun daha var.

Yüksək liqada qalmaq uğrunda mübarizə aparan “Lester” isə 18 oyundan sonra 18-ci pillədə qərarlaşıb. Komandanın aktivində cəmi 14 xal var. “Tülkülər”i liqada saxlayacaq 17-ci pillədən 1 xal ayırır.

Turnirin yeni favoriti “Çelsi” isə gözlənilmədən məğlub olaraq çempionluq şanslarını azaldıb. “Mançester Siti”nin isə uğursuzlu seriyası davam edir. “Şəhərlilər” bu səfər “Everton”a qalib gələ bilməyib – 1:1. Xosep Qvardiolanın yetirmələri 28 xalla 7-ci pillədə qərarlaşıblar.

Xatırladaq ki, daha əvvəl “Opta”nın superkompüteri “Liverpul”un çempionluq şanslarını yüksək qiymətləndirmişdi.