Azərbaycan millisinin futzalçısı: “Yunanıstanla matça hər cəhətdən hazırıq”

Yunanıstanla matça hər cəhətdən hazırıq.

Bunu “Report”a açıqlamasında Azərbaycan futzal millisinin üzvü Tofiq Mikayılov AVRO-2026-nın əsas mərhələsində sabah baş tutacaq Yunanıstanla oyundan öncə danışarkən deyib.

O, azarkeşləri sevindirməyə çalışacaqlarını bildirib:

“Baş məşqçi uşaqlarla danışıb, səhvlərimizi izah edib. Növbəti oyunda nəyə diqqət yetirməli olduğumuzu deyib. İki gündür bu görüşə hazırlığı davam etdiririk. Matça hər cəhətdən hazırıq. Turnir cədvəlində mövqeyimizi yaxşılaşdırmaq üçün Yunanıstanla oyunda qələbə qazanmaq vacibdir. Azarkeşləri həm baxımlı oyun, həm də qələbə ilə sevindirməyə çalışacağıq".

O, bir neçə gün öncə səfərdə Xorvatiya millisinə 2:9 hesabı ilə uduzduqları görüşə də toxunub:

“Hesab oyuna görə olmadı. Çox bəsit səhvlərdən qollar buraxdıq. Özümüz də bir neçə qol vəziyyətindən istifadə edə bilmədik. Amma komanda şəklində bu durumdan cıxacağıq. Yunanıstanla görüş də çətin keçəcək. Doğma məkanda oynayacağıq. Azarkeşlərə səslənirəm ki, zala gəlsinlər və dəstəklərini əsirgəməsinlər”.

38 yaşlı futzalçı hər kəsin qələbəyə kökləndiyini vurğulayıb:

“Rəqibi kiçiltmək olmaz. Əvvəllər zəif hesab olunan komandalar bu gün futzalda müsbət nəticələr qazanmaqla seçilirlər. Başa düşürük, yunanlar da meydana qələbə üçün çıxacaqlar. Yaxşı oyun olacaq, amma komandamız qələbə qazanmalıdır. Başqa yolumuz yoxdur, komanda daxilində hər kəs qələbəyə köklənib”.

Qeyd edək ki, yığma AVRO-2026-nın əsas mərhələsində fevralın 4-də Bakıda Yunanıstanı qəbul edəcək. Oyun Bakı İdman Sarayında, saat 20:00-da başlayacaq.