“Liverpul” Mersisayd derbisindən sonra mətbuat konfransında iştirakdan imtina edib

“Liverpul”un baş məşqçisi Arne Slot və onun köməkçisi Sipke Hulshoff oyundan dərhal sonra qırmızı vərəqə almalarına görə mətbuat konfransında iştirak edə bilməyiblər. Baş məşqçinin ikinci köməkçisi Con Heytinqanın da şərh verməyəcəyinə qərar verilib.

“QELEBE.AZ” xəbər verir ki, bu barədə “This Is Anfield” nəşri yazıb.

“Everton” ilə qalmaqallı matçın (2:2) son fitindən sonra “Liverpul”un baş məşqçisi Arne Slot açıqlama verə və mətbuat konfransında iştirak edə bilməyib. Slot baş hakim Maykl Oliver ilə mübahisəyə görə qırmızı vərəqə alıb, eyni aqibəti onun köməkçisi Sipke Hulshoff yaşayıb.

İngiltərə Premyer Liqasının reqlamentinə əsasən, qırmızı vərəqə alan məşqçilər media qarşısına çıxmırlar. Klub ikinci köməkçi Heytinqanı mətbuat konfransına göndərə bilərdi, lakin bunu etməməyə qərar verilib.

Beləliklə, “Liverpul” matçdan sonra rəsmi şərhlərdən tamamilə imtina edib. Bunun əvəzinə komandanın kapitanı Vircil van Dayk hakimin işindən narazılığını bildirərək Maykl Oliverin “oyuna nəzarət etmədiyinə” diqqət çəkib.

Slot, Hulshoff və bu matçda qovulan Körtis Cons “Vulverhempton” ilə növbəti oyunu buraxacaqlar, komandanın müvəqqəti məşqçisi isə, ehtimal ki, Heytinqa olacaq.