İngiltərə Premyer Liqası: “Qudison Park”dakı sonuncu Mersisayd derbisi dramatik sonluqla bitib

İngiltərə Premyer Liqası XV turunda “Everton” “Liverpul”u qəbul edib.

“Report” xəbər verir ki, baş hakim Maykl Oliverin idarə etdiyi matç “Qudison Park”da baş tutub.

Növbəti mövsümü yeni meydanda – “Everton Stedium”da keçirəcək “mavilər” üçün “Qudison Park”dakı son Mersisayd derbisi xüsusilə əlamətdar olub. Oyunda hesabı Devid Moyesin yetirmələri açıb. 11-ci dəqiqədə Beto Carred Brantueytin ötürməsindən maksimum yararlanıb.

Lakin ev sahiblərinin sevinci çox çəkməyib. Belə ki, cəmi beş dəqiqə sonra Aleksis Makallister Məhəmməd Salahın dəqiq ötürməsindən sonra topu başla Pikfordun qoruduğu qapıya göndərib - 1:1.

73-cü dəqiqədə Salah komandasının hücumunu məntiqi sonluğa çatdırıb. Bununla belə, təzyiqi artıran “mavilər” 8-ci uzatma dəqiqəsində istəyinə çatıb. Ceyms Tarkovski tarazlığı bərpa edərək yekun hesabı müəyyənləşdirib – 2:2.

Oyundan sonra futbolçular arasında qarşıdurma baş verib. “Everton”dan Abdulay Dukure, “Liverpul”dan isə Körtis Cons ikinci xəbərdarlıqdan sonra qırmızı vərəqə alıblar. Baş hakim “qırmızılar”ın baş məşqçisi Arne Slota da qırmızı vərəqə göstərib.

Qeyd edək ki, hələ ötən ilin dekabrında keçirilməli olan bu matç əlverişsiz hava şəraiti ilə əlaqədar ertələnmişdi.

Beləliklə, 24 oyundan sonra “Liverpul”un 57 xalı var. Çempionatın şəriksiz liderinin ən yaxın təqibçisi 50 xala malik “Arsenal”dır. “Everton” 27 xalla 15-ci pillədə qərarlaşıb.