Azərbaycan cüdoçusu: "Böyük Dəbilqə"də qazandığım gümüş medala çox ehtiyacım var idi"

Bu medala çox ehtiyacım var idi.

Bunu "Report"a açıqlamasında Özbəkistanın paytaxtı Daşkənddə keçirilən "Böyük Dəbilqə"də gümüş medal qazanan Azərbaycan cüdoçusu Turan Bayramov (66 kq) deyib.

22 yaşlı idmançı yarışın yüksək səviyyədə təşkil olunduğunu bildirib:

"Mən də yaxşı hazırlaşmışdım. Bəzi səbəblərə görə 5-6 aydır tam məşq edə bilmirdim. Sonuncu turnirim ötən ilin sentyabrında Zaqreb Qran-prisi olmuşdu. Orada da bürünc medal qazanmışdım. Həmin vaxtdan sonra yarışlara qatılmamışdım. İki aya yaxındır ki, məşqlərə tam start vermişəm. Məqsədim var idi, bu medalı qazanmağı çox istəyirdim. Buna ehtiyacım var idi, çünki çoxdandır güləşmirdim, "rels"dən çıxmışdım. Özümü toparlamağı bacardım".

T.Bayramov Özbəkistana qızıl mükafat üçün getdiyini söyləyib:

"Hədəfim bu idi. Düşünürəm ki, fasilədən sonra gümüş medal da qənaətbəxş nəticədir. Finaladək bütün qarşılaşmalarda tam üstünlüklə qalib gəldim. Həlledici görüşdə kobud səhv etdiyim üçün uduzdum. Rəqib də ağıllı idmançıdır və boşluqdan istifadə edərək məni əks fənddə yaxaladı. Qarşıda hansı yarışlara qatılsam, əlimdən gələni edəcəyəm. Təlim-məşq toplanışımız olacaq".

Qeyd edək ki, Azərbaycan "Böyük Dəbilqə"də üç idmançı ilə təmsil olunub. Balabəy Ağayev (60 kq) və Yaşar Nəcəfov (66 kq) medal qazana bilməyib.