Naxçıvanda Bədən Tərbiyəsi və İdman Günü ilə bağlı cüdo üzrə açıq birincilik keçirilib

Naxçıvan Muxtar Respublikası Gənclər və İdman Nazirliyinin "İdman həftəsi" adlı tədbirlər proqramına uyğun olaraq 5 Mart – Bədən Tərbiyəsi və İdman Günü ilə bağlı martın 4-də İlham Əliyev adına Olimpiya İdman Kompleksində 2011-2013-cü il təvəllüdllü oğlan və qız cüdoçular arasında Naxçıvan şəhər açıq birinciliyi keçirilib.

"Report"un yerli bürosu xəbər verir ki, Gənclər və İdman Nazirliyi və Azərbaycan Cüdo Federasiyasının (ACF) dəstəyi, Naxçıvan Şəhər Gənclər və İdman İdarəsinin ilə Uşaq-Gənclər İdman Məktəbinin birgə təşkilatçılığı əsasında reallaşan yarışda 12 çəki dərəcəsi üzrə ümumilikdə 81 idmançı mübarizə aparıb.

Yarışda hakim qismində Arzu Acalova və Bəhriyyə Hüseynova iştirak ediblər.

Oğlanlar arasında Ayaz Əliyev (30 kq), Yusif Əhmədli (34 kq), Mətin Salahov (38 kq), Rauf Hacızadə (42 kq), Fuad Cəlilzadə (46 kq), Elman Rzazadə (50 kq), İsmayıl Şükürlü (55 kq), Yusif Əsədli (60 kq), Nadir Məmmədov (66 kq) və Səccad Heydərov (66+ kq) fəxri kürsünün ən yüksək pilləsinə qalxıblar. 

Qızların mübarizəsində isə Sona Bağırova (36 kq) və Mələk Novruzova (40 kq) birinci yeri tutublar.

İlk üç yerin sahiblərinə diplom və medallar təqdim olunub. 

Qeyd edək ki, "İdman həftə"si çərçivəsində martın 5-də idman ictimaiyyəti ilə görüş keçiriləcək, mükafatlandırma tədbiri ilə həftəyə yekun vurulacaq.