Samir Abasov: "Turan Tovuz" azlıqda qalmamışdan öncə daha yaxşı oynayırdıq"

"Turan Tovuz"un futbolçusu qırmızı vərəqə almamışdan öncə daha yaxşı oynayırdıq.

"Report" xəbər verir ki, bunu "Neftçi"nin baş məşqçisi Samir Abasov "Turan Tovuz"a qarşı Misli Premyer Liqasının XXVI turunun oyunundan sonra baş tutan mətbuat konfransında deyib.

Mütəxəssis heç-heçə başa çatan qarşılaşma barədə danışıb:

"Rəqib komandanın futbolçusu qırmızı vərəqə almamışdan öncə daha yaxşı oynayırdıq. Futbolçularımız tapşırıqları daha düzgün yerinə yetirirdilər. Sürət və dinamika var idi. "Turan Tovuz"un oyunu bəlli idi. Ancaq müdafiə olunurdular. İlk yarıda iki dəfə rəqib qapısı qarşısında təhlükəli qol vəziyyətləri yaratdıq. İkinci hissədə daha istəkli idik. Əvəzetmələrin köməyi sayəsində qol istəyimizi reallaşdırdıq".

Qeyd edək ki, XXVI turun görüşündə "Neftçi" evdə "Turan Tovuz" ilə heç-heçəyə razılaşıb - 1:1.