NBA çempionu Basketbol Şöhrət Zalına daxil ediləcək

2020-ci ildə Milli Basketbol Assosiasiyasının (NBA) çempionu olmuş Duayt Hovard Basketbol Şöhrət Zalına daxil ediləcək.

"Report" xəbər verir ki, bu barədə ESPN telekanalının jurnalisti Şems Çaraniya "X" sosial şəbəkə hesabında yazıb.

39 yaşlı basketbolçu ilk səsvermədə Basketbol Şöhrət Zalına seçilib.

Qeyd edək ki, D.Hovard NBA-da "Orlando", "Los-Anceles Leykers", "Hyuston", "Atlanta", "Çarlotte", "Vaşinqton" və "Filadelfiya" komandalarında çıxış edib. O, 2020-ci ildə "Los Anceles Leykers"in heyətində NBA çempionu olub. Basketbolçu keçirdiyi 1242 matçda orta hesabla 15,7 xal, 11,8 ribaund və 1,3 məhsuldar ötürmə ilə yadda qalıb.