Rauf Məmmədov özbəkistanlı şahmatçı üzərində qələbəni dəyərləndirib

Azərbaycanlı şahmatçı Rauf Məmmədov Bakıda təşkil olunan "Çempionların savaşı" turnirində özbəkistanlı Rüstəm Kasımcanov üzərində qələbəni dəyərləndirib.

"Report"un məlumatına görə qrossmeyester yarışdan sonra jurnalistlərə açıqlama verib.

O, Almaniyadakı turnirdən sonra bir qədər yorğunluq olduğunu söyləyib:

"Təşkilatçılara təşəkkürümü bildirirəm ki, belə gözəl yarış keçirdilər. Almaniyadakı yarışdan sonra bir az yorğunluq var idi. Sevinirəm ki qələbə qazandım"

R.Məmmədov turnirdə blits növündəki oyunların daha asan keçdiyini bildirib:

"Blits daha asan idi. Altı oyuna 11 xal yarım topladım. Sonra bir az motivasiyam itdi və səhvə yol verdim. Sonda mənim üçün hər şey yaxşı bitdi".

Qeyd edək ki, rapid və blits oyunlarının nəticəsinə əsasən Azərbaycan çempionu Rauf Məmmədov FIDE Dünya çempionu Rüstəm Kasımcanovu (Özbəkistan) 12:10 hesabı ilə üstələyib.

Digər görüşdə isə qadınlar arasında ölkə çempionatının qalibi Günay Məmmədzadə dünya və Avropa çempionu Antoaneta Stefanovaya (Bolqarıstan) eyni hesabla qalib gəlib.