Aşağı yaş qrupları üzrə Azərbaycan çempionatlarının formatı dəyişə bilər

Aşağı yaş qrupları üzrə Azərbaycan çempionatlarının formatı dəyişə bilər.

Bu barədə "Report"a açıqlamasında "Neftçi" Futbol Akademiyasının direktoru Cemal Bülbül bildirib.

O, AFFA-nın Yarışların Təşkili Departamentinin əməkdaşları ilə görüş zamanı bir sıra təkliflər irəli sürüldüyünü söyləyib:

"Direktorlar və koordinatorların iştirakı ilə toplantı gerçəkləşdi. Burada liqaların keçirilməsi, təşkilatçılıq və başqa məsələlərlə bağlı problemlərə toxunuldi. Hər kəsin fikirlərini soruşdular. Hamı bəzi məsələlərdə ortaq fikirlər səsləndirdilər. U-8-dən U-19-dək bütün liqaları dəyərləndirdik. Aşağı yaşlarda uşaqların daha çox oynaması üçün AFFA-dan yeni format tərtib etməsi ilə bağlı istəklərimiz oldu. Tövsiyəmiz hər uşağın ən azı bir hissə, 15-20 dəqiqə oynaması ilə bağlıdır. Hissələrin sayının artırılmasını istəyirik. Məsələn, 3-4-ə qaldıra bilərik".

C.Bülbül futbolçuların da sayında dəyişiklik ola biləcəyini vurğulayıb:

"U-13 çempionatında bir komandada 9 oyunçu meydana çıxır. Bunun 11 olmasının tərəfdarıyıq. Çünki U-14-də bu cürdür. Bir çox ölkələrdə də belədir. Ona görə də bu formata keçilməsini xahiş etdik".