"Atletiko"nun futbolçusu "Real Sosyedad"la matçda 30 dəqiqəyə poker edib

"Atletiko"nun norveçli hücumçusu Aleksander Sörlot İspaniya La Liqasının XXXV turunda "Real Sosyedad"a qarşı matçda 30 dəqiqə ərzində dörd qol vurub.

“QELEBE.AZ” xəbər verir ki, görüş Madriddəki "Riyad Eyr Metropolitano"da keçirilib.

Sörlot 7, 10, 11 və 30-cu dəqiqələrdə fərqlənib. Birinci və üçüncü qollar arasındakı fasilə 3 dəqiqə 57 saniyə təşkil edib. Bu nəticə İspaniya çempionatları tarixində rekord olub – 1995-ci ildə "Deportivo"nun futbolçusu Bebeto 4 dəqiqə 43 saniyəyə het-trik etmişdi.

Həmçinin norveçli oyunçu ölkə çempionatında matçın əvvəlindən ən tez üç qol vurmuş futbolçu olub. O, 1941-ci ildə 15 dəqiqə ərzində rəqib qapısına üç dəfə qol vuran Edmundo Suaresin nəticəsini üstələyib.

Görüş "Atletiko"nun 4:0 hesablı qələbəsi ilə başa çatıb. Madrid komandası 70 xalla turnir cədvəlində üçüncüdür. "Real Sosyedad" isə 43 xalla 12-ci pillədə qərarlaşıb.