Bakıda uşaqlar üçün “İdman gimnastikadan başlayır" estafet yarışları keçirilib

Bakıda 1 İyun - Uşaqların Beynəlxalq Müdafiəsi Gününə həsr olunan “İdman gimnastikadan başlayır” estafet yarışları keçirilib.

"Report" xəbər verir ki, bu barədə Gimnastika Federasiyasının mətbuat xidməti məlumat yayıb.

Yarışda 3 fərqli uşaq evindən gələn ümumilikdə 30 uşaq iştirak edib. Onlar “Şahinlər”, “Birlik” və “Super balacalar” komandaları adı altında bir araya gələrək, 5 fərqli oyun növündə öz çevikliklərini və komanda ruhlarını nümayiş etdiriblər.

Əyləncəli atmosferdə keçən estafet yarışı uşaqlara maraqlı təcrübə qazandırıb. Müsabiqə boyunca uşaqların şövqü və enerjisi tədbirə xüsusi ab-hava qatıb. Ən önəmlisi isə odur ki, hər bir uşaq diqqət mərkəzində olub, onların sevinc dolu təbəssümləri bu günün əsas qazancı sayılıb.

Tədbirin ən sevilən qonağı isə Azərbaycan Gimnastika Federasiyasının rəsmi maskotu Tilli olub. O, uşaqlarla birgə əylənib, onların oyunlarına qoşulub və bayram coşqusunu daha da artırıb.

Yarışın sonunda bütün uşaqlar mükafatlandırılıb, qalib komanda isə kubok və xüsusi hədiyyələrlə təltif olunub.

Qeyd edək ki, tədbir uşaqlara unudulmaz anlar yaşatmaq və onların sağlam, aktiv həyat tərzinə marağını artırmaq məqsədi daşıyıb.