Azərbaycan millisinin üzvü: "Avropa Kubokunun əsas mərhələsində hədəf mükafatçılar sırasına düşməkdir"

Azərbaycanın qadınlardan ibarət 3x3 basketbol millisinin Avropa Kubokunun əsas mərhələsində hədəfi medallar uğrunda mübarizə aparmaq və mükafatçılar sırasında yer almaqdır.

Bunu "QELEBE.AZ"a yığmanın üzvü Dina Ulyanova deyib.

O, Avropa Kubokunun Kosovoda keçirilən təsnifat mərhələsinin qalibi olmaları ilə bağlı fikirlərini bölüşüb:

"Təəssüratlarımız, əlbəttə ki, müsbətdir. Çünki istəyimizə nail olduq. Ümumiyyətlə, daha yaxşı oyun sərgilədik. Hazırlaşmaq üçün daha çox vaxtımız da var idi. Məqsədimiz yalnız qələbə qazanmaq idi. Avropa Kubokunun əsas mərhələsi üçün də kifayət qədər vaxtımız var. Hədəf medallar uğrunda mübarizə aparmaq və mükafatçılar sırasına düşməkdir. Səhvlərimizin üzərində işləyəcəyik. Rəqiblərimiz də güclüdür. Bu idman növündə gözlənilməz nəticələr də olur. Hər şey öz əlimizdədir".

Qeyd edək ki, Avropa Kubokunun final mərhələsi sentyabrın 5-7-də Danimarkanın paytaxtı Kopenhagendə baş tutacaq.