Azərbaycan millisinin böyük məşqçisi: "Reytinq turnirindəki nəticəmiz qənaətbəxşdir"

Azərbaycan yunan-Roma güləşçilərinin Macarıstanın paytaxtı Budapeştdə keçirilən reytinq turnirindəki nəticələri qənaətbəxş olub.

Bunu “QELEBE.AZ”a açıqlamasında millinin böyük məşqçisi Rövşən Bayramov deyib.

O, bəzi güləşçilərin zədə səbəbindən yarışa bilmədiyini vurğulayıb.

“Reytinq turniri yoxlama yarışı idi. İdmançılarımızın reytinqdə hansı yerləri tutacağını müəyyənləşdirir. Nəticələrimiz daha yaxşı ola bilərdi. Turnirdə əsas güləşçilərimizin əksəriyyəti zədə səbəbindən heç döşəyə çıxmadılar. Ümumilikdə nəticələr qənaətbəxşdir. İdmançılarımızın hansı səviyyədə olduqlarını müəyyənləşdirmək üçün yarışa qatılmışdıq. Nəticələrin zəif olmasının səbəbi bəzi güləşçilərin zədə üzündən yarışa qatılmamaları idi”.

Qeyd edək ki, yunan-Roma güləşi üzrə milli ilin son reytinq yarışını 4 medalla başa vurub.