Mahmud Qurbanov: "Moldovada qələbə qazanan "Sabah" işin yarısını görüb"

UEFA Konfrans Liqasının II təsnifat mərhələsinin ilk matçında “Petrokub”u (Moldova) səfərdə üstələyən (2:0) “Sabah” komandası cavab görüşü ərəfəsində işin yarısını görüb.

Bunu “Report”a açıqlamasında Azərbaycan millisinin sabiq məşqçisi Mahmud Qurbanov deyib.

Mütəxəssis “Sabah”ın işin yarısını gördüyünü düşünür:

“Bu matçla müqayisə etsək, məsələn, “Sele” ilə səfər oyununda “Sabah” daha yaxşı idi. Bu bəlkə rəqibin Moldova komandası olmasından irəli gəlir. Amma hər halda, qollar vurub, qələbə qazandılar. Fikrimcə, cavab oyunu üçün yaxşı nəticə əldə etdilər. Buna baxmayaraq, rəqib Moldova klubudur, rahatlaşmaq olmaz. Düşünürəm ki, işin yarısını görüblər”.

M.Qurbanov Bakı klubunun evdəki matçda diqtə etməli olduğunu bildirib:

“Sabah”da mübarizə, hərəkətlilik və istək görünürdü. “Petrokub”un qapıçısı da komandasını bir neçə dəfə qoldan xilas etdi. Amma digər tərəfdən, hər iki qolda qapıçının səhvi var idi. Hər şey nəticəyə bağlıdır. Azərbaycanda necə oynamalı olduqlarını, hər halda, komandanın baş məşqçisi daha yaxşı bilər. Yəqin ki, dünənki oyunlarını təhlil edəcəklər. Düşünürəm ki, “Sabah” evdə diqtə edən tərəf olmalıdır”.

Qeyd edək ki, komandalar arasında cavab matçı iyulun 31-də Masazırdakı “Bank Respublika Arena”da keçiriləcək.