Avstriya Voleybol Federasiyası rəsmisi: "Azərbaycanla oyunda qızğın rəqs olacaq"

"Şənbə günü Azərbaycanla oyunda isti rəqs olacaq".

"QELEBE.AZ"un məlumatına görə, bunu Avstriya Voleybol Federasiyasının idman direktoru Qotfrid Rat-Soberniq ORF-yə müsahibəsində deyib.

O, sentyabrın 10-da Azərbaycanın qadın voleybol millisi ilə seçmə oyunun Avropa çempionatına vəsiqə baxımından həlledici olacağını bildirib: "Azərbaycan bu dəfə fərqli nömrə altında oynayacaq".

Sentyabrın 6-da Gürcüstan millisinə 3:0 hesabı ilə qalib gələn Avstriya millisinin baş məşqçisi Roland Şvab da Azərbaycanla görüşün vacibliyindən danışıb: "Gürcüstana qarşı əla çıxış etdik. Düzü, rəqib yaxşı formasında deyildi. Ancaq digər tərəfdən, biz ilk dəqiqədən sonadək həqiqətən yaxşı oyun göstərdik. Bu impulsu özümüzlə şənbə günkü oyuna da saxlamalıyıq. Ümid edirəm ki, həmin gün zal dolu olacaq".

Komandanın liberosu Tamina Huber bütün diqqətlərini Azərbaycanla oyuna cəmlədiklərini qeyd edib: "Biz Gürcüstanla matçda öz işimizi gördük və 3 xal qazandıq. Avropa çempionatında iştirak şansının hələ də qalması bizi çox sevindirir. Tam diqqətimizi şənbə günü keçiriləcək oyuna cəmləmişik. Çünki hər şey həmin oyundan asılı olacaq".

Hücumçu Monika Krtianska Azərbaycanla oyunda azarkeşlərdən çoxlu dəstək görəcəklərinə inandığını bildirib: "Biz Gürcüstanla oyuna yaxşı nəzarət etdik və yaxşı təzyiq göstərdik. Ona görə də gürcülər dəqiq ola bilmədilər. İndi biz bütünlüklə şənbə gününün hazırlıqlarına fikrimizi cəmləmişik. Bu seçmə mərhələdə əvvəlki oyunlarda olduğu kimi, Şvexat şəhərində yenidən dolu zal görmək istəyirik. Ümid edirəm ki, Avropa çempionatına vəsiqə qazanacağıq".

Qeyd edək ki, Avstriya – Azərbaycan oyunu sentyabrın 10-u Bakı vaxtı ilə saat 22:20-də başlayacaq. Görüş Şvexat şəhərindəki "Multiversum" zalında keçiriləcək. Azərbaycan millisinə Avropa çempionatına qrup ikincisi kimi vəsiqə qazanması üçün qələbə və ya 2:3 hesablı məğlubiyyət kifayət edir.