AGF-in baş katibi: “Azərbaycandakı yarışların səviyyəsi digər ölkə federasiyalarının diqqətini cəlb edir”

“Azərbaycanda keçirilən yarışların səviyyəsi, möhtəşəm arenamızda olan şərait digər ölkə federasiyalarının diqqətini cəlb edir”.

Bunu “QELEBE.AZ”a açıqlamasında Azərbaycan Gimnastika Federasiyasının (AGF) baş katibi Nurlana Məmmədzadə Bakıda təşkil edilən idman gimnastikası üzrə Dünya Kuboku barədə danışarkən deyib.

O, Milli Gimnastika Arenasında start götürən mötəbər turnirdə 48 ölkə təmsilçilərinin qatıldığını və bunun Azərbaycanda keçirilən Dünya Kuboku yarışlarında rekord göstərici olduğunu bildirib.

Baş katib turnirdə Azərbaycanı təmsil edəcək gimnastlardan uğur gözlədiklərini əlavə edib: “Nikita Simonov ötən həftə Qətərdə keçirilən Dünya Kuboku mərhələsində bürünc medala layiq görülüb. İvan Tixonov Tokio Yay Olimpiya Oyunlarının iştirakçısıdır. Nazənin Teymurova bu ildən böyüklər yaş kateqoriyasında iştirak edir. O, ötən il gənclər arasında Avropa çempionatı və Avropa Yay Olimpiya Festivalında ölkəmizi təmsil etmişdi. Nazənin Azərbaycanın qadın idman gimnastikası tarixində ilk dəfə ölkəmizi finalda təmsil etmişdi. Dünya Kubokunda digər gimnastımız Samirə Qəhrəmanova da mübarizə aparacaq”.

Nurlana Məmmədzadə yarış iştirakçılarının vaxtından erkən Bakıya səfər etdiklərini vurğulayıb: “Əslində bura gəliş günü martın 7-sinə kimi nəzərdə tutulmuşdu. Bir çox nümayəndə heyətləri Bakıya birbaşa Qətərdən gəldikləri üçün yarış öncəsi məşqlərimiz də əvvəldən başlayıb”.

AGF rəsmisi Yay Olimpiya Oyunlarına lisenziya xarakterli Dünya Kubokunun 2024-cü ildə baş tutacağını deyib: “Gimnastikanın olimpiya növləri bir qədər fərqlidir. Bir növ Yay Olimpiya Oyunlarına təsnifat xarakteri daşıyırsa, digərində belə deyil. İdman gimnastikasında gələn il keçiriləcək Dünya Kuboku mərhələləri təsnifat xarakteri daşıyacaq”.

Qeyd edək ki, Milli Gimnastika Arenasında keçirilən Dünya Kuboku dörd gün davam edəcək.