Musa Qurbanlı Avropanın ən məhsuldar futbolçuları sırasına düşüb

“Qarabağ”ın hücumçusu Musa Qurbanlı 2022/2023 mövsümündə Avropada ən çox qol vuran futbolçular sırasında yer alıb.

“QELEBE.AZ”un araşdırmasına görə, 21 yaşlı forvard bütün turnirlərdə keçirdiyi 29 oyunda 20 qol vuraraq bu siyahıya düşüb.

Azərbaycan millisinin üzvü 18 dəfə Premyer Liqada, 2 dəfə isə Azərbaycan Kubokunda fərqlənib. Bu göstərici ilə o, 13-cü sırada qərarlaşıb. İsveçrə təmsilçisi “Yanq Boyz”un oyunçusu Jan-Pyerr Nsame də eyni sayda qol vurmasına baxmayaraq, kamerunlu bunu daha çox oyun keçirərək bacarıb.

Cari mövsüm Avropada hələlik cəmi 14 futbolçu 20 qol səddinə çata bilib. Siyahıya İngiltərənin “Mançester Siti” klubunun hücumçusu Erlinq Holann başçılıq edir. Norveçli 35 matçda 34 dəfə rəqib qapılarına yol tapıb. Onu 31 qolla Fransa PSJ-sinin üzvü Kilian Mbappe izləyir. Türkiyənin “Fənərbağça” klubunun formasını geyinən Enner Valensiya isə 26 topla ilk “üçlüy”ü qapayır.

Qurbanlı orta hesabla hər oyunda 0,68 qola imza atıb. Orta göstəriciyə əsasən, o, qitənin ən məhsuldar 6-cı futbolçusudur. Hücumçunu yalnız Erlinq Holann, Kilian Mbappe, Enner Valensiya, Robert Levandovski və Viktor Osimxen kimi ulduz futbolçular qabaqlayırlar.

2022/2023 mövsümünün ən məhsuldar futbolçuları:

1. Erlinq Holann (“Mançester Siti”) – 35 oyun / 34 qol (orta hesabla hər oyunda 0,97 qol)

2. Kilian Mbappe (PSJ) – 32 / 31 (0,96)

3. Enner Valensiya (“Fənərbağça”) – 33 / 26 (0,78)

4. Robert Levandovski (“Barselona”) – 32 / 25 (0,78)

5. Markus Reşford (“Mançester Yunayted”) – 42 / 25 (0,59)

6. Qonçalo Ramos (“Benfika”) – 35 / 23 (0,65)

7. Vissam Ben Yedder (“Monako”) – 34 / 22 (0,64)

8-10. Məhəmməd Salah (“Liverpul”) - 38 / 22 (0,57)

8-10. Mehdi Taremi (“Porto”) – 38 / 22 (0,57)

8-10. Harri Keyn (“Tottenhem”) – 38 / 22 (0,57)

11. Viktor Osimxen (“Napoli”) – 27 / 21 (0,77)