ANAMA-nın sədri: "Amputantlar arasında futbol komandaları yaradılacaq"

“Minadan zərər çəkən və müxtəlif bədən üzvləri amputasiya olunmuş şəxslərdən ibarət futbol komandaları yaradılacaq”.

“Report” xəbər verir ki, bunu Azərbaycan Minatəmizləmə Agentliyinin (ANAMA) sədri Vüqar Süleymanov AFFA ilə imzalanan Anlaşma Memorandumu zamanı jurnalistlərə açıqlamasında deyib.

O bildirib ki, amputantların sosial reabilitasiyasına dəstək olmaq məqsədilə belə bir addım atmağı planlaşdırırlar: “Anlaşma Memorandumunun imzalanmasında əsas məqsəd maarifləndirmə və mina təhlükəsi ilə mübarizə tədbirlərində futbolun potensialından istifadə etməkdir. Ümid edirəm ki, ANAMA və AFFA arasındakı əməkdaşlıq məhsuldar olacaq”.

Vüqar Süleymanov əlavə edib ki, ölkədaxili yarışlarla yanaşı, beynəlxalq turnirlərdə iştirak da nəzərdə tutulub: “Gələcəklə bağlı planlarımız böyükdür, AFFA ilə birlikdə müəyyən addımlar atacağıq. Ümid edirik ki, bu planların hamısı həyata keçəcək. Gələcəkdə həm beynəlxalq oyunların təşkilini, həm də Azərbaycan amputant yığmasının beynəlxalq turnirlərdə iştirakını gözləyirik”.

Qeyd edək ki, Bakı Olimpiya Stadionunda təşkil olunan tədbirdə Anlaşma Memorandumunu Vüqar Süleymanovla AFFA-nın baş katibi Sərxan Hacıyev imzalayıblar.