İspaniya La Liqasında XXXII turun oyunları davam edir.
Apasport.az xəbər verir ki, günün baş tutan yeganə qarşılaşmasında "Real Madrid" "Betis"lə üz üzə gəlib.
Çempionluq şansını davam etdirmək istəyən "Real" oyuna 3 xal qazanmaq üçün çıxıb. Oyuna yaxşı başlayan "kral klubu" Vinisiusun qoluyla hesabda önə də keçib.
Oyunun son dəqiqəsinə 1:0 üstünlüklə girən Madrid təmsilçisi 94-cü dəqiqədə faciə yaşayıb. Hektor Bellerin matçın bitməsinə saniyələr qalarkən "Betis"in bərabərlik qolunu vurub: 1:1.
Xallarının sayını 74-ə yüksəltməsinə baxmayaraq çempionluq şansını xeyli çətinə salan "Real" lider "Barselona"dan 8 xal geri qalır.
Kataloniyalıların ehtiyatında əlavə 1 oyun var.