Avropa Oyunlarına qələbə ilə başlayan kikboksçu: "Məqsəd bayrağımızı yüksəklərə qaldırmaqdır"

"Bütün rəqiblərə qarşı yüksək səviyyədə hazırlaşmışıq. Məqsəd üçrəngli bayrağımızı yüksəklərə qaldırmaqdır".

Bunu "QELEBE.AZ"un Polşaya ezam olunmuş əməkdaşına açıqlamasında III Avropa Oyunlarına qələbə ilə başlayan Azərbaycan kikboksçusu Fərid Ağamoğlanov deyib.

63,5 kq-da yarımfinala vəsiqə qazanan idmançı yarışda uğur qazanmaq üçün ciddi məşqlər etdiyini bildirib: "Federasiya rəhbərliyi sağ olsun, bizə hər cür şərait yaratdı. Hədəfimiz yalnız qızıl medaldır. Yaşasın Azərbaycan!"

O, slovakiyalı Filip Barakla 1/4 final görüşündə gücünü qorumağa çalışdığını söyləyib: "İlk döyüş hər zaman ağır olur. Ona görə tam gücünü ortaya qoya bilmirsən. Mərhələ adladıqca, daha güclü rəqiblərlə qarşılaşırsan. Buna görə gücümü növbəti görüşlərə saxlamışam. Hər döyüşə fərdi şəkildə yanaşırıq. Məşqçim ilk görüşdə bu cür döyüşməyimi məsləhət gördü, mən də əməl etdim. Şükürlər olsun ki, qələbə qazandım".

Ağamoğlanov ikinci raundda rəqibini nokauta salmaq imkanınn olduğunu vurğulayıb: "Amma məşqçim dedi ki, lazım deyil. Müəllimlərin sözünə qulaq asan hər zaman xeyir tapır. İnanıram ki, növbəti döyüşlərim daha yaxşı alınar".