"Sumqayıt"ın yeni transferi: "Azərbaycan və Estoniya çempionatları arasında oxşarlıq var"

"Estoniyadakı kimi, burada da 10 komandanın mübarizə apardığını və liqanın 4 dövrədən ibarət olduğunu bilirdim. Hardasa çempionatlarımız arasında oxşarlıqlar var".

"Report"un məlumatına görə, bunu "Sumqayıt"ın yeni transferi Erik Sorqa klubun mətbuat xidmətinə açıqlamasında deyib.

24 yaşlı hücumçu "gənclik şəhəri" təmsilçisinə keçməmişdən əvvəl "Qəbələ"də oynamış dostu Sergey Zenyovla danışdığını və ölkə haqqında məlumat aldığını söyləyib.

Estoniyalı forvard kollektivdə əla atmosferin olduğunu bildirib: "Maraqlı və intensiv məşqlər keçirik. Yoldaşlarım da məni yaxşı qəbul etdilər. Həm rus, həm də ingilis dilində danışdığım üçün heç kimlə ünsiyyət problemim yoxdur. Bütün məsələlərdə bir-birimizə kömək edirik. Deyə bilərəm ki, uyğunlaşma problemi yaşamıram. Komandaya qoşulduqdan sonra fiziki məşqçinin nəzarətində iki gün fərdi, daha sonra isə kollektivlə birlikdə məşqə çıxdım, tədricən isti havaya alışdım. İndi isə Türkiyədəyik, burada hər şey qaydasındadır. Komanda ilə birlikdə məşqə çıxıram, özümü əla hiss edirəm".

Sorqa hədəflərinin avrokuboklara vəsiqə uğrunda mübarizə aparmaq olduğunu vurğulayıb: "Baş məşqçimizlə bu barədə tez-tez danışırıq. Məqsədimizə çatmaq üçün mən də əlimdən gələn hər şeyi edəcəyəm. Həm vurduğum qollar, həm də komanda yoldaşlarıma verəcəyim qol ötürmələri ilə çalışacağam ki, fanatlarımızı sevindirim".