"Murov Az Terminal"ın baş məşqçisi: "İlk "dördlük"də yer almaq istəyirdik, amma çempion olduq"

"Ən azı ilk "dördlük"də yer almaq istəyirdik. Amma elə alındı ki, çempion olduq. Bu, əladır".

Bunu "Report"a açıqlamasında çimərlik voleybolu üzrə kişilərdən ibarət "Murov Az Terminal" komandasının baş məşqçisi İqor Olefir Türkiyədə keçirilən Avropa Kubokunun (Beach Volley European Cup) qalibi olmaları ilə bağlı danışarkən deyib.

Rusiyalı mütəxəssis yarışın yüksək səviyyədə təşkil edildiyini bildirib: "Təşkilatçılıq və matçların oynanıldığı məkan da yaxşı idi".

Azərbaycan millisinə də rəhbərlik edən baş məşqçi təlim-məşq toplanışına yollanacaqlarını söyləyib: "Növbəti il gənclər arasında Avropa çempionatı olacaq. Biz də bura hazırlaşırıq. Daha əvvəl Şərqi Avropa Zonal Assosiasiyasının (EEVZA) turnirinə qatılacağıq. Böyüklər MDB oyunları da daxil olmaqla, bir sıra yarışlarda qüvvəsini sınayacaqlar. Bir sözlə, yüksək səviyyəli turnirlər çoxdur".

İqor Olefir Azərbaycan çempionatını da keçirmək istədiklərini vurğulayıb: "Bunu unutmamalıyıq. Mübarizə 4 mərhələdən ibarət olacaq. Hətta ölkə kuboku da gerçəkləşəcək. Digər komandaların da qatılması üçün açıq çempionat təşkil ediləcək".