Azərbaycan millisinin böyük məşqçisi: Medallar qazansaq da, səhvlərimiz də çox oldu

Medallar qazansaq da, səhvlərimiz də çox oldu.

Bunu “QELEBE.AZ”a açıqlamasında Azərbaycanın yunan-Roma güləşi üzrə U-20 millisinin böyük məşqçisi Nurəddin Rəcəbov Qazaxıstanın paytaxtı Astanada keçirilən Jaksılık Uşkempirov turniri barədə danışarkən deyib.

Mütəxəssis güləşçilərimizin yarışda çıxışını dəyərləndirib: “Bu turniri komandamız üçün olduqca önəmli sayıram. Öncəliklə burada təlim-məşq toplanışı keçdik. Ümumiyyətlə, Asiya məktəbində texniki bacarıq Avropa məktəbindən üstün olduğu üçün buranı seçmişəm. Hər qitənin özünəməxsus güləş texnikası var. Qazaxıstanın bu baxımdan keyfiyyəti daha üstündür. Burada çox effektli məşqlər keçirdik. 7 dövlətin iştirakı ilə 160-dan çox idmançı bu toplanışda iştirak edirdi. Məcburiyyət qarşısında səhər və axşam məşqlərini iki yerə bölüb mərhələli şəkildə hazırlaşırdıq. Burada keçirilən təlimlərdə səhhəti ilə əlaqədar iştirak etməyənlər olsa da, onlar da tez bir zamanda bərpa prosesi keçib Qazaxıstanda bizə qoşuldular”.

N.Rəcəbov nəticələrin əhəmiyyətindən danışıb: “Qazandığımız nəticə bizi 60-70 faiz qane etdi. Bəzi çəkilərdə mübarizə aparan güləşçilərimizin çıxışından razı qalmadıq. 55 kq-da Hüseyn Savadovun güləşini çox bəyəndim. Yeniyetmələr arasından bizə qatıldığı üçün ondan sözügedən çəkidə belə bir performans gözləmirdik. 60 kq-da güləşən hər iki idmançımız məni məyus etdi. Onların təcrübəsi çox az idi və məşqçinin fikirlərini dinləmək istəmirdilər. 10 dövlətin iştirak etdiyi bir yarış idi. Səviyyə o qədər yüksək idi ki, komandamız burada Avropa və ya dünya çempionatı getdiyini zənn edirdi. Hər bir görüş ağır keçdi, bütün ölkələr qalibiyyət üçün gəlmişdilər”.

O, milli komandanın planlarını da açıqlayıb: “Martın 15-də Azərbaycana qayıdacağıq. Qısa müddət istirahət etdikdən sonra məşqlərə başlayacağıq. Azərbaycan Güləş Federasiyası bizə çox böyük diqqət ayırır. May ayında Dağıstanda və ya Xorvatiyada keçiriləcək beynəlxalq turnirlərdə iştirak edəcəyik. Öncəki yarışlarda bizi məyus edən idmançıları yenidən yoxlamaq istəyirik. Hazırkı nəticələrlə kifayətlənmirik. İdmançılarımız üçün təməl qururuq. Heyətə yeni gələn güləşçilər özlərini doğruldurlar. Güləşçilərimiz Avropa çempionatında da iştirak edəcəklər. Hələ ki, bu turnirə gedəcək heyət məlum deyil. Son qərarı starta 10 gün qalmış elan edəcəyik”.

Qeyd edək ki, Azərbaycanın yunan-Roma güləşçiləri Qazaxıstanda keçirilən turniri 3 qızıl, 2 gümüş, 5 bürünc medalla başa vurublar.