Premyer Liqa: "Qarabağ" evdə "Səbail"ə qalib gəlib

Futbol üzrə Azərbaycan Premyer Liqasında XXIX turun daha bir oyunu keçirilib.

"Report" xəbər verir ki, günün ikinci matçında "Qarabağ" Tofiq Bəhramov adına Respublika stadionunda "Səbail"i qəbul edib.

Qarşılaşma meydan sahiblərinin 4:2 hesablı qələbəsi ilə bitib. İlk qolu 7-ci dəqiqədə qonaqlardan Nir Bardea vurub. 15 və 40-cı dəqiqələrdə Yasin Benzianın dublu sayəsində Ağdam təmsilçisi fasiləyə üstün yollanıb.

69-cu dəqiqədə Toral Bayramov, 90-cı dəqiqədə isə Nəriman Axundzadə meydan sahiblərinin üstünlüyünü möhkəmləndirib. Paytaxt klubunun ikinci hissədə yeganə qoluna 88-ci dəqiqədə Rüfət Abdullazadə imza atıb.

Qeyd edək ki, günün ilk qarşılaşmasında "Turan Tovuz" evdə "Sabah"ı 2 cavabsız qolla məğlub edib. Tura sabah yekun vurulacaq.