Azərbaycan Badminton Federasiyasının rəsmisi: “Bu sahədə maddi təminatı zəif olan bəzi Afrika ölkələrinə yardım etdik”

Azərbaycan Badminton Federasiyası olaraq inkişafa ehtiyac duyan, lakin bu sahədə maddi təminatı zəif olan bəzi Afrika ölkələrinə yardım etdik.

Bunu “QELEBE.AZ”a açıqlamasında Azərbaycan Badminton Federasiyasının baş katibi Ramil Hacıyev Botsvanada yerli badminton qurumunun təşkilatçılığı ilə keçirilən tədbirdə iştirakı ilə bağlı danışarkən deyib.

Qurum rəsmisi Afrikanın 5 ölkəsinə badminton avadanlıqlarının çatdırılması ilə bağlı memorandum imzalandığını söyləyib:

"Ötən il Azərbaycan Badminton Federasiyasının prezidenti Taleh Ziyadov və Dünya Badminton Federasiyasının rəhbəri Poul-Erik Hoyer arasında Afrikanın 5 ölkəsinə badminton avadanlıqlarının çatdırılması ilə bağlı memorandum imzalanıb. Yardım Dünya Badminton Federasiyasının vasitəçiliyi ilə həyata keçirilir. Məqsəd badmintonun əlçatanlığını təmin etməkdir. Afrikanın bəzi ölkələrində maddi durum yaxşı olmadığı üçün orada badmintonçunun volan, raketka, idman geyimi ilə təmin olunmasında ciddi problemlər yaşanır. Biz də Azərbaycan Badminton Federasiyası olaraq inkişafa ehtiyac duyan, lakin bu sahədə maddi təminatı zəif olan bəzi Afrika ölkələrinə yardım etdik”.

Baş katib səfərin məqsədinin göndərilən avadanlıqların ünvana çatdırılmasına əyani şahidlik etmək olduğunu vurğulayıb:

“Botsvanaya səfərdə məqsəd, təbii ki, ilk olaraq yüksək nəticələrə imza atan komandamızı beynəlxalq turnirdə dəstəkləmək idi. Eyni zamanda yardım etdiyimiz badmintonçularla görüşmək, göndərdiyimiz avadanlığın ünvana çatdırıldığının əyani şahidi olmaq və yerində onların daha nəyə ehtiyaclarının olduğunu öyrənmək idi”.

O, əməkdaşlıq çərçivəsində Afrikanın 5 ölkəsindən idmançıların badmintonçularımızla birgə təlim-məşq toplanışında iştirakının nəzərdə tutulduğunu da söyləyib:

“Dəstəyimiz tək badminton avadanlığı ilə məhdudlaşmır. Bildiyiniz kimi, beynəlxalq təcrübəyə malik, yüksək səviyyəli peşəkar məşqçilərimiz var. Bu məqsədlə Afrikanın 5 ölkəsindən idmançıların badmintonçularımızla birgə təlim-məşq toplanışlarında iştirakı da nəzərdə tutulub. Artıq bu layihəyə start verilib. Kamerundan 2 oğlan və 2 qız idmançı artıq 1 aydır yığmamızın üzvləri ilə birgə toplanışda iştirak edirlər. Zambiya və Botsvananın da idmançılarının burada təlim-məşq toplanışı planlaşdırılır. Növbəti ilin əvvəlinə kimi bunu da reallaşdırmağı düşünürük”.

R.Hacıyev bu dəstəyin 2025-ci ildə də davam etməsinin gözlənildiyini vurğulayıb:

“Dəstəyimiz tək maddi-texniki təchizatla deyil, həm də onların oyun səviyyəsinin artırılması məqsədilə milli komandanın əsas heyəti ilə birgə təlim-məşq toplanışlarının təşkildir. Bu dəstəyin 2025-ci ildə də davam etməsi gözlənilir".

Qeyd edək ki, Azərbaycan Badminton Federasiyası və Dünya Badminton Federasiyası arasında Afrikanın 5 ölkəsinə - Niger, Qambiya, Kamerun, Madaqaskar və Botsvanaya badminton avandanlıqları hədiyyə edilməsi ilə bağlı memorandum imzalanıb.