Vaqif Sadıqov: "Neftçi"də birdən-birə böyük dəyişiklik gözləmək düzgün deyil"

Baş məşqçi dəyişikliyindən sonra "Neftçi"də birdən-birə böyük dəyişiklik gözləmək düzgün olmazdı.

Bunu "QELEBE.AZ"a açıqlamasında AFFA Məşqçilər Komitəsinin sədri, veteran futbolçu Vaqif Sadıqov deyib.

Təcrübəli mütəxəssis "ağ-qaralar"ın cari mövsüm uğursuz çıxışı barədə danışıb:

"Neftçi"nin problemi öncədən bəlli idi. Bunu həll etmək üçün baş məşqçi dəyişikliyinə getdilər, Roman Qriqorçukdan sonra Samir Abasovu gətirdilər. Birdən-birə böyük dəyişikliklər gözləmək düzgün olmazdı. Ən vacibi odur ki, hər birimiz "Neftçi"nin əzəmətinin qayıtmasını arzulayırıq. Komanda layiq olduğu yerdə qərarlaşmalı, azarkeşlərini çempionatda və Avropada sevindirməlidir".

V.Sadıqov sistemli işlərin görülməli olduğunu söyləyib:

"Kənardan baxıb nəsə tövsiyə etmək düzgün olmaz. Klubun daxilində olan insanlar var. Məncə, peşəkar və işi bilən insanlardır. Onlar bu səhvləri, problemləri görürlər. Bunun həlli üçün addımlar atacaqlar. Düşünürəm ki, transfer dönəmi başlayanda dəyişikliklərin şahidi olacağıq. İnanıram ki, tam fərqli, əzəmətli, güclü və layiq olduğu yeri tutan "Neftçi" görəcəyik. Uğursuzluq olanda günahı baş məşqçidə axtarmaq istəyirik. Son illərə baxsaq, görərik ki, belə dəyişikliklə müsbət nəticə əldə edə bilmirik. Hesab edirəm ki, məşqçini dəvət edib inanıblarsa, ona vaxt verilməli və arxasında durmalıdırlar".

O, Misli Premyer Liqasının XVI turunda reallaşan "Sumqayıt" - "Neftçi" matçı (2:0) haqqında da danışıb:

"Dinamik futbola şahidlik etdik. Meydan sahiblərinə, sırf baş məşqçi Vaqif Cavadova görə sevinmək lazımdır. O, yeni nəsli təmsil edən gənc mütəxəssisdir. Özünü doğrultmaqla yolunu davam etdirir. "Sumqayıt"ı özünəməxsus nizam-intizam olan kollektiv kimi görürük".

Qeyd edək ki, "Neftçi" 16 turdan sonra 13 xalla 8-ci pillədə qərarlaşıb.