AFFA Hakimlər Komitəsinin mütəxəssisi: “Klubların müraciəti əsasən yeni qaydalarla bağlıdır”

Klubların müraciəti əsasən yeni qaydalarla bağlıdır.

Bunu “QELEBE.AZ”a açıqlamasında AFFA Hakimlər Komitəsinin mütəxəssisi Orxan Məmmədov klublara keçdiyi seminarlarla bağlı bildirib.

Sabiq hakim müraciət edənlərə UEFA-nın təlimatlarını çatdırdıqlarını söyləyib:

“Klubların müraciəti əsasən yeni qaydalarla bağlıdır. Yeniliklər, dəyişikliklər barədə onlara məlumat verməyimizi istəyirlər. Həmçinin Azərbaycan çempionatında bəzi epizodları da komandalara çatdırırıq. Qərarların hansı hallarda, nəyə görə verildiyini izah edirik. Yəni özümüzdən heç nə demirik. UEFA-nın təlimatlarında nə görmüşüksə, klublara çatdırırıq. Çünki məlumatlarımız nəyəsə əsaslanmalıdır”.

O, seminarların keçirilməsi üçün klublar tərəfindən müraciət aldıqlarını vurğulayıb:

“Həmişə klublarımızı maarifləndirmək istəmişik. Çalışırıq ki, nəinki Azərbaycan çempionatında, beynəlxalq yarışlara çıxanda da problemlə üzləşməsinlər. Sadəcə, klublardakı vaxt məhdudiyyətinə görə bəzən boşluqlar olur. Amma adətən əksər vaxtlar klublar özləri müraciət ünvanlayırlar. Biz də canla-başla dəvətləri qəbul edirik. Ayrılan vaxt ərzində onlara ən kritik məqamlarla bağlı tələb olunan məlumatları çatdırmağa çalışırıq. Hansı hallarda sarı vərəqə ala bilərlər, nə zaman kapitanlar oyunçuların etiraz etməsinə imkan verməməlidir və sair kimi qaydaları onlara başa salmağa çalışırıq. UEFA-nın bizə göndərdiyi, həmçinin özümüzün Azərbaycan çempionatlarından hazırladığımız materialları təqdim edirik. Gördüyümüz problemləri də kliplərə daxil edirik. Futbol ictimaiyyətinin əksəriyyətinin bilmədiyi qaydaları izah edirik”.

Mütəxəssis aşağı liqa təmsilçilərinin də bu seminarlara maraq göstərdiyini deyib:

“Premyer Liqa klublarının əksəriyyəti ilə görüşmüşük. Tam səmimi deyirəm, bu seminarlardan sonra aşağı yaş qruplarından ibarət komandaların məşqçiləri də müraciət etmək istəyirlər. “Səbail”, “Qarabağ” klubları dəvət edib. Hətta “Neftçi”nin Yüksək Liqada oynayan qadın komandasına da seminar keçmişəm. Klubların marağı böyükdür. Özləri də görürlər ki, bir çox dəyişikliklərdən xəbərləri yoxdur. Onları qınamıram. Bu barədə məlumatlandırılmalıdırlar. Müraciətlərin sayı çoxalır. Hətta aşağı yaş qrupları üzrə liqalardan da maraq göstərirlər. I Liqa klublarının hamısı olmasa da, 30-40 faizinin müraciəti əsasında onlara seminarlar keçmişik”.