"Neftçi"nin baş məşqçisi: "Son bir neçə oyunumuz istədiyimiz kimi alınmadı"

Son bir neçə oyunumuz istədiyimiz kimi alınmadı.

"Report" xəbər verir ki, bunu "Neftçi”nin baş məşqçisi Pərviz Səmədov Voleybol Federasiyasının mətbuat xidmətinə açıqlamasında deyib.

Kişilər arasında Azərbaycan Yüksək Liqasının VII turunda "Xilasedici" komandasına 0:3 hesabı ilə məğlub olan "Neftçi"nin baş məşqçisi bu mövsüm yaxşı komanda topladıqlarını söyləyib:

“Çempionata uğurlu start vermişdik. Son bir neçə oyunumuz istədiyimiz kimi alınmır. Bu mövsüm yaxşı komanda toplamışıq. Oyunçularımızdan biri cəmi iki turdur ki, komandaya qatılıb. Onun uyğunlaşması üçün zaman lazımdır. Çempionatda daha maraqlı oyunlar qarşıdadır. Səhvlərimizi düzəltməli və daha ciddi şəkildə məşqlərə davam etməliyik. İnanıram ki, növbəti matçlarda daha yaxşı çıxış edəcəyik və turnir cədvəlində irəliləyəcəyik”.