AKF prezidenti: "Kikboksinqçilərimiz Azərbaycan bayrağını beynəlxalq arenalarda dalğalandırmaq üçün əllərindən gələni edirlər"

İdmançılarımız Azərbaycan bayrağını beynəlxalq arenalarda dalğalandırmaq üçün əllərindən gələni edirlər.

"Report" xəbər verir ki, bunu Azərbaycan Kikboksinq Federasiyasının (AKF) prezidenti Orxan Əliyev Fəxri xiyabanda Ümummilli Lider Heydər Əliyevin məzarını ziyarət etdikdən sonra jurnalistlərə açıqlamasında deyib.

O, hazırda Bakıda qonaq olan Dünya Kikboksinq Təşkilatları Assosiasiyasının (WAKO) prezidenti Roy Beyker və vitse-prezidenti Salim Kayıcının ölkəmizə gəlişinin böyük idman hadisəsi olduğunu vurğulayıb:

"Ölkəmizdə hər zaman idmana xüsusi diqqət ayrılır. Azərbaycan Prezidenti İlham Əliyevin dəstəyi sayəsində kikboksinq sahəsində görəcəyimiz işlər daha da yaxşı olacaq. Federasiya olaraq kikboksinqçilərimizin uğurlu çıxışı üçün əlimzdən gələni edirik. Hazırda Bakıda olan qonaqlarla danışıqlarımız davam edir. İnşallah, 2027-ci ildə kadetlər, yeniyetmələr və gənclər arasında Avropa çempionatı paytaxtımızda baş tutacaq".

Federasiya rəhbəri Azərbaycan kikboksinqçilərini qarşıda bir sıra yarışların gözlədiyini söyləyib:

"Bizi qarşıda maraqlı yarışlar gözləyir. Avqustda Azərbaycanı Çində Amil Quliyev təmsil edəcək. O, hazırda Tailandda təlim-məşq toplanışındadır. Noyabrda böyüklərdən ibarət yığma Birləşmiş Ərəb Əmirliklərinin paytaxtı Əbu-Dabidə keçiriləcək dünya çempionatında çıxış edəcək. İdmançılarımız var gücü ilə çalışır ki, Azərbaycanın bayrağını beynəlxalq arenalarda dalğalandırsınlar".

Qeyd edək ki, WAKO-nun prezidenti Roy Beyker və vitse-prezidenti, Türkiyə Kikboksinq Federasiyasının prezidenti Salim Kayıcı martın 5-dək Bakıda səfərdə olacaqlar. Onların Milli Olimpiya Komitəsi, Gənclər və İdman Nazirliyinin rəhbərliyi və Azərbaycan Kikboksinq Federasiyanın fəxri prezidenti Adil Əliyevlə görüşləri nəzərdə tutulub.