"Quba"nın baş məşqçisi: "Ordu" ilə matçın əvvəllərində hesabda önə keçsək də, sonradan tempdən düşdük"

"Ordu" ilə matçın əvvəllərində hesabda önə keçsək də, sonradan tempdən düşdük.

“Report” xəbər verir ki, bunu “Quba”nın baş məşqçisi Şəhriyar Əsgərov Azərbaycan Basketbol Liqasının XX turunda “Ordu” ilə matçdan sonra klubun mətbuat xidmətinə açıqlamasında deyib:

Mütəxəssis səhvləri sonradan düzəltmələrinə baxmayaraq, uduzduqlarını bildirib:

“Oyun bir qədər aqressiv alındı. Matçın əvvəllərində hesabda önə keçsək də, sonradan tempdən düşdük. Əsas üzvlərimizdən biri zədə səbəbindən oynamadı. Oyun bərabər səviyyədə keçdi. Sadəcə, atışlarda səhv etdik. Doğrudur, səhvlərimizi sonradan müəyyən mənada düzəltdik, amma sonda 9 xallıq fərqlə uduzduq. Müntəzəm çempionatın son oyunu idi. Məncə, pis alınmadı. Bəzi oyunçulara istirahət verdik, gənclər şans qazandı. Bütün oyunçular yaxşı oynadı. Kameron Consa qarşı çox sərt müdafiə olsa da, istədiyi xalları yığdı”.

Ş.Əsgərov komandadan razı qaldığını nəzərə çatdırıb:

“Bu görüşdə müəyyən məsələlər də ortaya çıxdı. Pley-in mərhələsində böyük ehtimalla “Ordu” ilə qarşılaşacağıq. Yaxşı oldu ki, öz oyunçularımızı sınadıq. Komandadan razıyam. Oyunçuların istədiyi alınmasa da, var güclərini meydanda qoydular. Rəqibimiz “Ordu” olarsa, həmin görüşə də yaxşı hazırlaşacağıq. Fikrimcə, pley-in matçında meydanda tamam başqa komanda görəcəyik”.

Qeyd edək ki, Quba Olimpiya İdman Kompleksində baş tutan B qrupunun “Quba” - “Ordu” matçı qonaqların 97:88 hesablı qələbəsi ilə yekunlaşıb.