Türkiyə Kuboku: “Göztəpə” 49 illik aradan sonra yarımfinala vəsiqə qazanıb

Futbol üzrə Türkiyə Kubokunun 1/4 final mərhələsində “Beşiktaş” “Göztəpə”ni qəbul edib.

“QELEBE.AZ” xəbər verir ki, “Beşiktaş Park”da start götürmüş matçı baş hakim Atilla Karaoğlan idarə edib.

Oyundan hesab 30-cu dəqiqədə açılıb: “qara qartallar”ın albaniyalı yarımmüdafiəçisi Ernest Muçi topu tora qovuşdurub. 36-cı dəqiqədə ev sahiblərinin müdafiəçisi Tayyib Sanuç qırmızı vərəqə alaraq meydandan qovulub. Qırmızı vərəqədən sonra cərimə zərbəsi qazanan izmirlilər bu imkandan maksimum yararlanıblar: 38-ci dəqiqədə braziliyalı Romulu Kordozo dəqiqə zərbə ilə topu qapıdan keçirib.

İkinci hissədə təzyiqi artıran qonaqlar matçın sonlarına doğru daha iki qol vuraraq İstanbul təmsilçisini məğlub ediblər: 79-cu dəqiqədə penaltidən fərqlənən Kordozo cəmi iki dəqiqə sonra da qola imza ataraq hettrik edib.

Beləliklə, “Göztəpə” 49 illik aradan sonra Türkiyə Kubokunun 1/2 finalına adlayıblar. İzmirin “sarı-qırmızılar”ı növbəti mərhələdə “Trabzonspor”la münasibətlərə aydınlıq gətirəcəklər.

Mərhələnin digər qarşılaşması isə “Konyaspor”la “Qalatasaray” arasında baş tutacaq.

Oyunlar aprelin 22, 23-ü və ya 24-də keçiriləcək.